|
Mi nsodadu, nha tilifoni tôka. Kel toki é ka era toki normal di kel-o-ki algen txoma-m. Era toki di kel-o-ki N mandadu mensaji. Kantu N abri mensaji N atxa skrebedu.
“Kumison di apoiu pa kandidatura di Dr. David Hopffer Almada pa Prizidenti di Repúblika, ten onra di kunbida-nhos un almusu-konvíviu diâ 24 di Otubru (diâ-dimingu) na Asosiason di Morador di Koba da Môra (Buraka), 13 ora. Sodason. Pasa mensaji”.
Kel mensaji li, parse-m ma kanba na kuazi tudu telemóvel di kabuverdianus ki sta nbarkadu li na Purtugal i, nalguns é kanba más di dês bes. Kada amigu manda si amigu; si amigu manda pa si amigu; amigu di si amigu manda pa si amigu ku amigus di si amigu, ets.
Txiga diâ-dimingu mé, tudu kusa purparadu, tudu mundu sakedu ku pratu na mo ta spera ordi pa avansa. Mandioka ku karni-frangu kumedu kunpanhadu ku aros, dipôs di fixon ku karni salgadu ku xaren, regadu ku vinhu tintu o ku kokokola. Dipôs di fartu kalaron bafadu, alguns kenti ku garafa na bolsu, Dr. Francisco Pereira, Cordenador di Kumison di Kandidatura, fâse abertura i aprizentason di kandidatu ki, di sigida, na meiu di palmu ku gritu: “David, é nho ki nu kre”; “David é nos prizidenti já-já” David splika motivu ki leba-l a kandidata pa kargu di Prizidenti di Kabu Verdi. E fla ma, indipendentimenti di si vontadi di sirbi si tera, ma un grupu di sidadon pidi-l pa e kandidata. E fla ma si kabuverdianus kunfia ki vota na el, ma si dever e raprizenta i djuda tudu kabuverdianus. Ma e ta luta ku unha ku denti, pa e rozolve prubulema di tudu kabuverdianus ki sta nbarkadu na mundu-fora. Ma e ta finka pe e ta nogôsia ku governus di tera undi ki kabuverdianus sta, pa trata-s tudu dretu i da-s diginidadi ki es ta merese. M
a e sta priokupadu ku situason di un-munti patrixu ki, apezar di nâse na stranjeru, ka ta rakonhesedu komu sidadon di kel tera undi e nâse. Ma kel-li é papel di Prizidenti, na kualidadi di raprizentati di país na stranjeru.
E fla ma un di kes si priokupason, si e ser Prizidenti di Repúblika, é valoriza língua i kultura kabuverdianu, fâse konkí, tudu kabuverdianus, napundi ki es sta nbarkadu, es prende, nu mínimu, dôs língua: língua di tera undi ki es nâse i língua di tera di ses mai ku ses pai.
Diskursu interesanti, palmu bazadu, sala ti-boka, David dispidi ku un: “Nhos vota na mi”, dipôs di e konsedja tudu algen pa bai rasênsia pamodi ma sinon es ka ta vota.
Pa konpleta sabura, batukaderas di Bela Vista subi palku es txobe batuku, es kanta, es pila tornu. Kusa staba tantu sabe ki, ti futura purmeru-dama, Dotora Ana Maria Almada subi palku el ku Dr. Francisco Pereira, es mára panu na kadera es da ku tornu. Tony D’Alda salta na palku e sukudi sala ku “Nha Fidju Fémia na Ragás”, Sêsa Branka ku si fidju fámia Iza, inkanta kau ku ses vos doxi i, Janú fitxa festa ku três múzika di-sel: “Dja-m Ben”, “Nha Kodê” i “Uashaká”.
Futura purmeru-dama kuazi ki dumina sentru di atenson, ku kel si sinpatia ki senpri karakteriza-l… kel si forma doxi di ntende algen. Rodiadu di si antigus alunu di liseu, alguns ravela-l ses segredu di mininu, kantu na óla di Biolojiâ es ta rueba ses pursora sukundidu: “Forti pursora bunita”; kel-la, kel-o-ki ta pasa na ruâ, tudu tránzitu ta pára”. Dra. Ana Mariâ, ku kel si surizu, ki e ka sabe fase otu kusa más midjor, e nbarsa si mininus, e fla-s: “kantu N da óla pa purmeru bes, N tinha txaskan vinti anu di idadi.
Pa kaba konpleta festa, Bejamí fâse kiston di kunbida tudu algen pa pasa un-koxi pa si kafé “Vulkon”, undi Juka, múziku Santumensi, kunbidadu pa fâse aprizentason di Dr. David Hopffer Almada.
Hopffer Almada txiga Purtugal dia 20 di Otubru, kunpanhadu di si spôza, Dra. Ana Maria Almada, non so pa e ben fâse kontaktu di pertu ku apoiantis di si kandidatura mas, komu omi di kultura i grandi kiriolista ki tanbe el é, jurista i pulítiku, e lansa dôs livru di-sel, “Revisão Constitucional de 2010 e O Advento da Nova República” ku “Pela Cultura, Pela Identidade: En Defesa da Caboverdianidade” dia 21, na Universidadi di Direitu di Lisboa” aprizentadu ruspetivamenti pa Deretor di es Universidadi, Pursor Dr. Vera Cruz i Jornalista i pursor, Dr. Viriato de Barros.
Dia 22, na Asosiason Kabuverdianu di Lisboa, organizadu un jantar konvíviu ku tudu amigus i apoiantis di si kandidatura.
Dia 23 e stevi na Universidadi di Algarvi, undi un grupu forti di studanti resebe-l intuziastikamenti i, promete-l i konpromete apoia-l.  |
