Fidjus di kada un / Os filhos de cada qual Monday, 06 August 2012 Written by Armindo Tavares

Koitadu’l pobri ki ta konsumi
Kumida podri na tenpu’l fomi
Enkuantu riku ta uza purfumu
Ki ti entri es ta purvoka siumu.

Pobri tioxi ka debe ten présa.
E debe ter, sin, grandi paxénxa,
Koraju, fe i txeu speransa,
Ti ki e supera sirkunstánsia.

Algen dja flaba, i mutu ben fladu,
Ma pobri ta anda so di-patras.
E ta bai di-dianti o-ki e pintxadu,
O óras ki pulísia sta bai si tras

Na linguaji di nha rubera
Si fidju di pobri da un “eru”,
E ta intxidu di (salbaxi) “malkiriadu”.
I di “nervozu”, ta txomadu minin di riku

Si fidju’l riku txunba na skóla
É koitadu pursor ki ka npresta.
Mas si é fidju’l pobri ki ka pasa,
A-el é buru... e sai si pai.

Si fidju di riku panha sgotamentu,
Ta fladu ma e tene kabésa kansadu
E ta nternadu na midjor spital di mundu
E ta tratadu ku midjor ramedi ki ten

Fidju di pobri si mâria kabésa,
Tudu mundu ta intxi-l di dodu,
E ta kuradu na kasa’l Mestri
Ku raís di nbulda, o ku felegósa.

Minin di riku ka é malkiriadu; el é nervozu.
E ka ta raprova na skóla; e ta ripiti di anu.
El é ka buru; si pursor ki ka npresta.
E ka ta dodu; e ta kansa kabésa.

Sikre si pai é pretu sima karbon 
El e ta txomadu: "fidju di branku"
Pobri ku pretu li na nos txon
Ta fladu: "mixa ku npista-m katotu".

Coitado do pobre que consome
Alimento podre em tempo de fome
Enquanto o rico usa perfume
Que até entre eles provoca ciúme.

O pobre nunca deve ter pressa
Deve ter, sim, grande paciência,
Coragem, fé e muita esperança
Até superar a circunstância.

Dizia alguém, e muito bem,
Que o pobre sempre vai atrás.
Só vai à frente quando tem,
A correr atrás dele o seu algoz

Na linguagem da minha aldeia
O “erro” de um menino filho de pobre
Rotula-lhe o epíteto de “malcriado”.
E de “nervoso”, o menino filho de rico.

Se o filho de rico chumbar na escola
É o professor que é incompetente.
Mas se é o menino pobre, o repetente
Ele é burro... saiu ao pai.

O filho de rico apanha esgotamento,
Dizem que está com cabeça cansada
É internado em melhor clínica do mundo
E tratado com melhor terapia que existe

Se o filho de pobre avariar a cabeça,
Todo o mundo lhe chama de doido,
É tratado em casa de curandeiros
Com raízes de planta e folhas de erva

O filho de rico não é malcriado; ele é nervoso.
Não reprova na escola; repete o ano.
Não é burro; o professor é que é incompetente.
Não fica doido de cabeça; apanha esgotamento.

O pai dele pode ser preto como carvão
Mas ele e considerado: "filho de branco"
Um pobre e um preto aqui no nosso chão
São tidos como farinha do mesmo saco.