Bu vótu ê arma di luta Friday, 29 June 2012 Written by Doutor Azágua

Mas, realmenti djâ bu sinta pô pensa drêtu ma bu vótu ê mesmu inpurtanti? Si bu ka faze kelâ, kumesa ta ntende uki sta en jogu.

Di akordu ku disionáriu, palavra "vótu" orijina di Latin voluntas = vontadi.

Vótu ê un forma legal di skodje ken ki ta ben reprezenta-nu pulítikamenti y listamentu ileitoral ê kondisãu indispensável na izersísiu di sidadania, já ki através d’el, sidadãu ta bira ileitor.

Nos tudu sabe ma vótu ê arma di sidadãu dentu di sosiedadi dimokrátiku. Nos reprezentantis na kámara, na kongrésu y na palásiu di guvernu ê skodjêdu ku nos vótu.

Mas, realmenti djâ bu sinta pô pensa drêtu ma bu vótu ê mesmu inpurtanti? Si bu ka faze kelâ, kumesa ta ntende uki sta en jogu. Sima nu sabe, nos ê governadu pa prizidenti di kâmara, primêru ministru, y prizidenti di repúblika.

Es três galu ê xéfi di sés pulêru. Ê es k’ê maridu di galinha. Tó k’es kanta, tudu pintôn ta labanta. Kada un ten un séri di responsabilidadis dentu di sê ixféra di puder. Pa nu pidi pa rua sta alkatruadu, nu ta rekorre pa prizidenti di kâmara; ken ki ta difini manêra ki ta sér pulítika di idukasãu, saúdi, ikonumia, finansas, trabadju, etc. ê primêru ministru, ku ajuda di sê ministrus. Prizidenti di Repúblika ta garanti unidadi di Nasãu y di Stadu, integridadi di territóriu, independênsia nasional y ta vijia y garanti kunprimentu di Konstituisãu y tratadus internasionais. Prizidenti tanbe ta reprezenta interna y ixternamenti Repúblika di Kabu Verdi y, pa uniãu íntima di sê funsons, ê Komandanti Suprému di Fôrsa Armada.

Alén di kárgus izekutivus, ê ileitu pa vótu popular menbrus di puder lejislativu, ou seja, vereadôris, diputadus di nasãu. Es pesoas ten konprumisu di kria leis ki ta difini dia-a-dia di tudu nos. Kantu dinhêru debe sér investidu na skolas, kriasãu d’un ospital, kantu aviãu debe kunpradu, konstrusãu di aeroportu, kantu debe gastadu na konstrusãu di stradas, etc. ê alguns di kestoins envolvidus di trabadju d’es pesoas ki nu ta vota n’es.

Óra ki nu bai urna pa vota, nu ta skodje pesoas ki sta bai reprezenta-nu. Pesoas ki konxe mutu ben nos prublémas y ki ten verdadêru komprumisu ku nos. Vota ê algu mutu más sériu ki marka un "X" ó kalka na botôn. Óra ki nu sta vota, nu sta skodje kês ki ta disidi distinu di dinhêru ki nu ta paga d’inpostu. Pur isu ê inpurtanti nu skodje ku kuidadu un kandidatu. El ten ki sér un pesoa dignu di kargu k’el sta bai okupa.

Nu ten ki faze un izámi di konxsiênsia y vota konfórmi nu identifika k’un di kês kandidatus pa kuzas k’es ten fêtu ó faze pa nos país. Nu ten ki lenbra senpri ki vótu ê maior izersísiu di dimokrasia y nu ka pode disperdisa-l. Ê txêu risponsabilidadi, di modu nu debe presta atensãu y ten grandi konxsiênsia na mumentu ki nu sta vota.

Ka bu ten dúvida. Vota! Ê bu direitu! Ê bu disizãu!

Si bu ka konkorda ku nha opiniãu, nton faze sima Ntóni Ka Ten Kónta frâ, "óra ki bu bai vota, si sta txeu béntu vota na partidu ventuínha, si sta txuba vota na otus partidu, má si sta sol y kalor vota na partidu strela negra, PAICV."