Politu (Oitavu párti) Thursday, 19 April 2012 Written by Armindo Tavares

I pamodi es labanta sinhoris ajenti Jinu di Soza ku Pila Ku Nha Boi alebi, es komete un krimi di kalúnia, njúria i difamason, purvistu na artigu "WC" di Kódiku Sivil, konjugadu ku létra "K" di ALUPEC.

V SÉNA / ES MOKU, MÁS DIVOGADA DOTÓRA ROZÁRIA

JUIS – (pa Alsinda) Kuse ki sinhóra Alsinda ten pa fla peranti es Trubunal? (Alsinda ta txora ka ta konsigi papia. Juis ta bira pa Béba) Sinhóra Béba pode konta-nu kuse ki pasa onti, li na pórta di Trubunal?

BÉBA – Kusa ki pasa onti é kel ki Djukruku dja konta-nho. Du-restu é la na Skuadra ki kontise… ki es dagi na algen sima dagi na limária. (E ta labanta bulúzia e ta mostra beregon na ndjarga) Sima Djukruku, komu e ka sa ta podeba andaba, pamodi e staba ku bala sotidu na pe, es rasta-l sima rasta porku, dasdi karu ti dentu’l Skuadra, ta bai ta da-l soku na piskos, ta pintxa-l na kósta, ta da-l pónta-xutu na máma-kadera. Es fitxa-nu dentu di un kau stretu, mi ku Alsinda, es modja-nu txon ku orina txoku, es manda-nu pa nu duspi tudu nunpriti, es toma-nu nos kusas fepu es bai ku el pa es bai guarda. Nu deta nunpriti, riba’l kama simentu modjadu ku orina txoku.

PURKURADOR – (pa Juis) N kre fase un obuservason, sinhor miritísimu. (Juis ta da ku kabésa ma sin, e ta volta pa Béba) Nha atxa ma nhos debeba lebada pa un Otel? Ma nhos debe dada kama móla-fleks pa nhos detaba na el?

Drª ROZÁRIA – Miritísimu Juis, obuservason di Ministéri Públiku é inoportunu i umilhanti. E ta kontraria tudu prinsipiu di pruzunson di inosensia, konsagradu na artigu 34º, pontu 1. di Konstituison di Repúblika. I é ta invoka prátika di tortura i violason di Direitu Fundamental di arguidu i sidadon, igualmenti konsagradu na pontu 6. di es mesmu artigu di Konstituison.

PURKURADOR – Miritísimu juis, si Pulísias bira ta da tudu kriminozus ki pasa-s pa mo, mordormia di un sidadon, di-li un dos diâ… tudu algen ta bira ta komete krimi.

Drª ROZÁRIA – Pamodi?

PURKURADOR – Ka nu konfundi direitu di un sidadon ku direitu di un dilinkuenti… i inda más óras ki dilinkuenti sta prezu. Direitu ki prezu ten… nos tudu nu sabe é kál é: di sta fitxadu.

Drª ROZÁRIA – Direitu ki prézu é di sta fitxadu... sin sinhor. Mas so dispos di un julgamentu justu, ku ruspetu pa direitu di kontraditóriu - artigu 34º, pontu 4. di nos Lei Fundamental -, ku akuzason provadu i justifikadu. É ka so ma un Pulisia, o kualker otu marmanju dja fla ma un algen komete un krimi, pa e sa ta tirsidjadu... ta metedu na kadiâ. I mesmu standu na kadiâ, sikre konsigidu provadu ma e komete krimi, e ka ta perde tudu si direitu. E ta perde si liberdadi, e ta perde direitu di e uza si kapasidadi jurídiku. Mas nunka e ka ta perde si personalidadi. I óras ki nu papia di personalidadi, nu sa ta papia di un algen enkuantu Ser Umanu.

JUIS – Okei. Nhos nu dexa es kiston li, ki sa ta parse más ku pulítika i filozofiâ, nu konsentra na kiston más jurídiku... na matérias di faktu.

Drª ROZÁRIA – Ki ta rende midjor!

JUIS – Dóna Béba, nha kontínua.

BÉBA – Oxi sedu, kantu es bai tra-nu di kadiâ pa es tarse-nu Trubunal, ki es ntrega-nu nos ropa ku nos kusas ki es toma, dinheru ki nu teneba na nos bolsu nu ka atxa. Nen na di-meu, nen na di Alsinda ka staba nun tiston.

Djukruku ta labanta dedu, Juis ta da-l ku kabésa pa e papia, Purkurador ta ravolta.

PURKURADOR – Miritísimu, a-el dja é papiaba na si ves. Si nu ben fika so nu ta ntoronpe julgamentu, nu ta entra na diálogu… dja N odja ma nu ka ta kaba nen di-li un anu.

JUIS – Talves kusa ki e tene pa e fla seja relevanti pa pursesu.

Drª ROZÁRIA – Nu ka sta ku présa pa julgamentu kaba. Nu kre pa é ser ben-fetu.  Nu sta li pa nu diskubri verdadi, i verdaderu algen ki sabe modi ki kusa pasa é es. Purtantu, nu debe obi-s tudu kusa ki es ten pa es fla.

JUIS – Nhu pode papia, sinhor Djukruku.

DJUKRUKU – Sinhor Dr. Juis, dja N skeseba dja di fla-nho, ma kantu nu staba na Skuadra nu ta spéra pa es tarse-nu julgamentu, ma ajenti Diká pasa na mi, e rabata-m nha kodjon… nha korpu d’omi, e labanta-m pe di txon e larga-m. Kantu N stinba na txon, kes-otus si kolégas fika ta ri.

PURKURADOR – Nhu ten próva di kusa ki nhu sa ta fla? Nhu odja ma akuzason ki nhu sa ta fase é gravi… si nhu ka ten próva… pode kusta-nho karu!

DJUKRUKU – Nha próva é Beba ku Alsinda ki nu staba la djuntu. Foi ses dianti ki pasa.

PURKURADOR – A-es es ka pode sirbi-nho di tistimunha. Kuse ki ta garanti-nu ma nhos ka sta konloiadu?

DJUKRUKU – Staba la otus prezus tanbe!

PURKURADOR – Prezu ka pode sirbi tistimunha di kel-otu prezu. Es ka ten personalidadi…

Drª ROZÁRIA – Nhu sa ta po-m pa N torna ripiti kel ki dja N flaba nho un bes: prezu ka ten liberdadi… ka ten kapasidadi pa e konvense djustisa ma e ten rezon… mas e ten personalidadi. Personalidadi ta nâse djuntu ku algen i, so é ta kaba kel-o-ki algen móre.

JUIS – Sinhóra Béba inda ten más kusa pa fla?

BÉBA – Alsinda sta triste si, pamodi es po-l si fidju pikinoti na ruâ, banda di dés óra di noti, ku fomi… rapasinhu nen Praia ka konxe… ka konxe ningen.

Drª ROZÁRIA – Dipundi ki es po-l na rua?

BÉBA – Di Skuadra la Txada Santantoni.

Drª ROZÁRIA – Kantu anu ki mininu ten?

Alsinda ta bira pa rusponde, e ta komesa txora, vós ka ta sai.

JUIS – Sinhor Ofisial, nhu leba-l kuartu-banhu e bá laba rostu, nhu da-l un pingu di águ e bebe nu odja si e ta kalma.

PURKURADOR – (ravoltadu) So nes Trubunal ki N sa ta odja prezus ta tratadu di kel manera li. É pur isu ki Kadiâ ka tene kau poi más algen. Ku kel tipu di tratamento li… mi tanbe N kre ser dilinkuenti. Dá un arguidu ki sta xintadu na banku’l reu ta julgadu, lisensa pa bai laba rostu?!

Ofisial ta pega Alsinda na mo ta sai ku el.

JUIS – Nha kontínua, sinhóra Béba.

BÉBA – Alsinda fla Xefi ma mininu sta pikinoti, pa e ka dexa-l bai fika na ruâ kel-óra di noti el-so, Xefi ri, fla-l ma si ten kau ki ka ta falta algen, ma é na ruâ, pamodi ma bandidus ta sta senpri na kasa.

Drª ROZÁRIA – Xefi poi mininu la pa ruâ?

BÉBA – Purmeru e manda da-l banhu na águ friu… Alsinda fla-l ma mininu staba duenti, ma staba kustipadu, ta durmi ku febri tudu noti… es xinta es ri.

Drª ROZÁRIA – Mas, es da-l banhu?

BÉBA – Es da-l sin. Feiu kusa pa nhos odja kel Anju di Kristu dja tingi sima bara barnelu… si denti ta krapu-krapu na kunpanheru, so friu.

Alsinda ta kanba un-kusinha midjor, ta torna bai xinta la undi e staba.

JUIS – Dja nha sta más rakupeladu?

ALSINDA – Dja N sta un kusinha más midjor.

JUIS – (pa Purkurador) Akuzason ten más algun kiston?

PURKURADOR – (pa Divogada) I a-el tanbe kuse ki e ben fase Praia ku mininu pikinoti?

Drª ROZÁRIA – Diginísimu, ka ten ninhun lei ki ta fla ma algen ka pode anda ku si fidju dentu si téra.

PURKURADOR – Si el propi é ka ruspeta si fidju pikinoti, e ka ten ki ben poi kulpa na kada kual. Pulísia ta kometeba krimi si es fitxaba menor la na Skuadra.

Drª ROZÁRIA – Okei. Suponhamus ki é si... ki nhu tene rezon. Ago nu skese di fator jurídiku o legal, pur uns sugundinhu, nu baziâ na prinsipius mural.

PURKURADOR – Mural ningen é ka obrigadu ten… ningen ka ta bai kadiâ, ka ta sotadu, nen ka ta paga multa pamodi e ka toma un algen-grandi benson.

Drª ROZÁRIA – Muitu ben. Mas e ta ruedu... nen si é na kósta. I kuse ki ta kustaba si un des pegaba na kel kiriansinha di Dios, i es bai poba el durmiba na ses kasa?! A-es es debe ten fidju di-serteza!

JUIS – (pa Alsinda) Si nha sa ta xinti más midjor, nha konta-nu modi ki kusa bai. Mas, nha konta-nu sima pasa. A-nha é ka obrigadu rusponde, mas si nha kre rusponde, nha rusponde ku verdadi.

ALSINDA – N ta konta kel ki pasa.

JUIS – (pa Ministéri Públiku) Akuzason kre fase arguida algun purgunta?

PURKURADOR – A-nha pake ki nha ben Praia ku mininu pikinoti, inda kaba, sima nha fla, e staba duenti?

ALSINDA – N benba ku el pa nu ben sistiba julgamentu di si pai ku si armun… pa es ben konxeba kunpanheru.

PURKURADOR – (ku ar di gozu) Koitadu di kiriansa’l-nha!... dja e fika sen e konxe si pai. Mas en kóntra-partida, a-nha ku el nhos ta bai fika djuntu uns-tenpu, nhos ta kontra ku kunpanheru o-ki nhos ta toma sol la Txada Bonbéna. Nha sabe undi ki Txada Bonbéna fika?

ALSINDA – (ta komesa txora otu bes) Nhu sa ta manda-m Son Martinhu?

Drª ROZÁRIA – Nha ka meste ki txora. E sa ta mete-nha fereti, mas e ka ta poi-nha na kadiâ nau. (E ta bira pa Purkurador) Sinhor Purkurador, nu sta na un julgamentu, nes mumentu... i non na Pulísia Judisiária na invistigason. Es fórma di mete arguidu medu, a lus di Direitu Internasional, sta proibidu ti pa Judisiaria na ses investigason. Nu sa ta lida ku kiriatura i, oxi en diâ ten un-munti mekanismus pa diskubri próvas, sen miasa nen turtura ningen.

Purkurador ta ri.

JUIS – Okei. I Difeza kre fase arguidu algun purgunta?

Drª ROZÁRIA – (pa Alsinda) Kantu anu ki kel fidju di-nha pikinoti ten?

ALSINDA – E ten séti anu i tal.

Drª ROZÁRIA – Nunka e ka binha Praia?

ALSINDA – Tioxi e ka benba Praia. E ka konxe nun kau.

Drª ROZÁRIA – Nha Béba fla li ma antis di Pulisias toma-nhos kusas pa es bai guarda, ma nhos teneba dinheru na bolsu. É si me?

ALSINDA – Aian.

PURKURADOR – Kantu ki nha teneba na bolsu di-nha? (Alsinda ta tuntunhi. El é ka sabe konta dretu, nen el nen Béba) Nha sa ta tuntunhi pake? Nha sa ta studa konta mintira?

JUIS – Es purgunta é ka nisisáriu, sinhor Purkurador. E ka relevanti pa pursesu.

Drª ROZÁRIA – Obrigadu, miritísimu. (Pa Alsinda) I kantu nhos resebe nhos kusas di vólta…

ALSINDA – Dinheru ka staba la nun tiston.

PURKURADOR – Nton nha kre fla ma é Pulisias ki furta nhos dinheru?

Drª ROZÁRIA – Si é ka Pulísias… na Skuadra parse-m ma ka ten ratu!

JUIS – Ministéri Públiku ten más kusa’l purgunta antis di duduzi akuzason?

PURKURADOR – Pa mi… N ta komesa-l ja.

JUIS – Nton… forsa.

PURKURADOR – Miritísimu Juis, karu koléga i divogada di difeza, tudu algen ki sta li prizenti nes Trubunal. Sen puxa-puxa txeu, N ta komesa pa loba atuason di kes dos Pulísia, ki di un fórma mutu intilijenti, enbóra ku rukursus tékniku fraku ki es ten, es konsigi infrenta un situason i es rozolve un konfuzon ki podia kababa di fórma ben trájiku. Pur isu, kamaradas ajenti sta di parabens. I parse-m ma Stadu ka ta dexa di fika bazofu ku es nhos nobri didikason. Nos tudu nu sabe, ma na un bran-bran di kel natureza li… sima kel ki kontise onti, é difisil pa kaba sima é kaba. Ku txaskan un pankadiadu lijeramenti, pankadiadu ki atxa kel ki é merese, o midjor: kel ki e buska. Pois, nu rapara: Sinhor Djukruku, di akordu ku si Rejistu Kriminal ki nu konxe rai-di dretu i ki nu tene li na si pursesu pregadu, uns tenpu a tras e kondenadu ku péna di prizon ki e bai kunpri la Kadiâ Sibil, pamodi e sota un Juis di Trubunal Popular, kaba e briga ku Milisianus kantu bai prende-l. Oxi, otu bes, dja e torna ben julgadu, pa omesmu kusa. So ki di es bes, foi própi Trubunal ki sirbi tistimunha di si salbaxariâ. A-el é un reinsidenti nes tipu di kusa i é di kes “thug” konxedu, ki tudu algen ten medu del. E ten un renkor forti dentu del sotidu, kóntra tudu kenha ki ta bisti farda di otoridadi, prinsipalmenti kamaradas Milisianus, ku kes pobri purfisional sima kamaradas ajenti Jinu ku Pila Ku Nha Boi. Miritísimu Juis, eselentísima koléga, Djukruku senpri foi, i sima dja nu odja li, e kre kontínua ta ser sosiu di sinhor Politu, kel sépa dilunkuenti, un prigozon ki nos moku nu konxe, tirandu sinhor dotor Juis ku Drª Mónika si propi Divogada, ki apezar di es nâse li nes téra, es kiriadu na stranjeru. Kuantu a sinhóra Béba ku sinhóra Alsinda, pamodi es ka ruspeta ordi ki Pulisia da-s, es komete un krimi di dizobidensia ku purtubason di ordi públiku, purvistu i punidu pa forsa di artigu TX di Kódiku Penal vijenti. I pamodi es labanta sinhoris ajenti Jinu di Soza ku Pila Ku Nha Boi alebi, es komete un krimi di kalúnia, njúria i difamason, purvistu na artigu "WC" di Kódiku Sivil, konjugadu ku létra "K" di ALUPEC. Purtantu, pa purmeru krimi Ministéri Públiku ta pide un péna non inferior a 18 mês di kadiâ pa kada un des, pa es bai kunpri un pédra un pédra la Kadiâ Sibil. I pa krimi di kalúnia, njúria i difamason kóntra sinhoris ajenti Jinu di Soza ku Pila Ku Nha Boi, Ministéri Públiku ta mante pididu di indiminizason na kel valor ki es pidi, pa rakunpensa-s danus moral ki es koza-s i, pa linpa-s ses bon nomi. Pur isu, kada un des debe da kada un Pulísia 150 kontu di indiminizason. I kuantu a sinhor Djukruku, Ministéri Públiku ta pidi péna másmu pirmitidu pa lei, pa un krimi di Txustxusi Géra, na termu di létra "Y" di Lei di "AK", konjugadu ku rasenti Dikretu-Lei di Ka Ten Tadju, pa agravanti di ser kóntra ajenti di otoridadi. Du restu, i pa N tirmina, N ta pidi urijenti, ki sinhor dotor Juis toma midida mármi, mas ku firmésa pa garanti ordi, suguransa i diginidadi, pa sirbi di inzenplu pa kel-otu julgamentu ki sta pa kontínua. Mutu obrigadu.

Timenti Purkurador sa ta faseba alegason, Ofisial sai i na fin e kanba e labanta Juis dedu.

OFISIAL – Kon lisensa, sinhor Dotor Juis...

JUIS – Algun kusa, sinhor Ofisial?

OFISIAL – Tilifonadu la di Ospital, ta kumunikadu ma sta la un rapasinhu nternadu, ki fla ma e txoma Pedrinhu… (Alsinda ta smaia, ta kai di moxu. E ta tradu di sala) fidju di un sinhor ki dja dura prézu. Fladu ma e sta mutu mal... ligadu na máki, ku febri pinomoniâ agudu. Ma un xofer di Takis atxa-l anti-manxe baxu baléta detadu, kubridu ku papelon, dentu’l friu ku brufa txuba.

Pániku ta intxi sala, Béba tanbe ta smaia, Drª Mónika ta smaia na plateia, Juis ta suspende julgamentu.

JUIS – Julgamentu ta fika suspensu sine die.

OFISIAL – Julgamentu sta nseradu.

Obs: Falta so más un Párti pa pésa finda, más N ka tene kalku na publika-l.

Obrigadu pa tudu nhos ki da es pésa atenson dasdi si Purmeru Párti, sima Dr. Marsianu Morera i otus, ki N ta purbeta pa N da un grandi abrasu.