Katxor Ku Makaku (Purmeru párti) Saturday, 23 June 2012 Written by Armindo Tavares

Na altura di ileison, kusa ki bu kre bu ta konsigi. Ki basta bu papia ku Prizidenti, bu fla-l ma bu ta djuda-l fase kanpanha, ma bu ta vota nel, é ta ranja-u un kasa na zóna “xiki” di Sidadi.

I SÉNA / MAKAKU KU MAKAKA

Makaku ta txiga kasa soris ta baza, ta rabenta pórta ta kanba, ta xinta si trás, ku medu pa katxor ka kanba tras del.

MAKAKA — (sakedu dianti di Makaku, ku dos mo na koxa) Kuse ki buli-u ki bu sta soris ta baza di kel manera li, maridu? (Makaku ta abri bóka mas vós ka ta sai) Fla-m kuse ki kontise? A-bo bu ka trabadjador, pa fla ma bu sta kansadu… bu ka balenti, pa N kuda ma dja bu lônba bu koléga!

MAKAKU — (ta kosa ladu) N sa ta ben fla-u un kusa, pamodi mi N ka ta sukundi-u nada.

MAKAKA — Si propi ki ta fasedu. Mudjer ku maridu ka debe sukundi kunpanheru segredu.

MAKAKU — Dja N odja ma kualker di es diâ li N ta bai kadiâ…

MAKAKA — (ta bense fadigadu) Krédu un-krus, bataretu! Ave-mariâ xeia di grasa! Aburnúnsia, águ-tuntun, bordoléga, mar di Spanha, pe di xulé, dor di obidu! I pamodi? Es pega-u ta furta-s ses kusa?

MAKAKU — So N sa ta fla-u, pa bu fika ta sabe. Si un diâ N sai di kasa N ka volta… é pamodi N sta na xilindró.

MAKAKA — Tra bóka, Makaku. Kel-li é kusa ki bu ta dizeja? Rasa bu pidi Nhordes pa djuda-u.

MAKAKU — É ka kusa ki N ta dizeja, mas dja N odja ma ka ten tadju.

MAKAKA — Tadju ten senpri. Furta ku getu… ka bu dexa bu pegadu. O dja bu skese kóre?

MAKAKU — Kóre?! A-mi N ka ta tarse dizaforu di ninhun sta armadu en matxu pa kasa.

MAKAKA — Xinti modi ki bu ta poi korpu gurgunha-m… korason ta ba-m pe!

MAKAKU — Ki basta dja N fla-u… (Makaka ta nbaxa si frenti ta po-l mo riba duedju) pa bu ka ben fla ma panha-u nsodadu… ma bu ka sa ta speraba.

MAKAKA — I é kenha ki sa ta arma en matxu ku bo… ki sa ta kre xatia-u kabesa?

MAKAKU — Dispos bu ta sabe. E sa ta xatia-m bida, mas diâ ki N rozolve na ratxa-l kósta… N ka sabe kuse ki ta da!

MAKAKA — (ta bira rostu pa ladu) Nha maridu sima ki dja bira balenti!

MAKAKU — (xatiadu) Bo ki sa ta disdangu-m?!

MAKAKA — (ta bira pa el faxi) N ka sa ta disdangu-u, nau.

MAKAKU — Nton N ta papia ku bo… bu ta poi rostu pa ladu?

MAKAKA — Diskulpa-m… diskulpa-m. Mi pa mi…

MAKAKU — Pa bo… N pode bai kadiâ?

MAKAKA — Si é pa N obi ma bu lonbadu… kel-me, é midjor N obi ma bu sta na kadiâ…

MAKAKU — Nanprésta, pixinginha! Ma dja N bai kadiâ bu ta fika avontadi pa bu kanpia ku otus makaku ti bu farta.

MAKAKA — (ta fase ma e ka ntende, ta kore-l mo na rostu) N ta bai djobe-u, N ta leba-u kafe, almusu, djanta.

MAKAKU — (ta kalma) Nton… bá ta purpara, pamodi ka sa ta dura. Bu pode fika diskansadu, pamodi bu ka ta obi fladu ma nha xaren lansadu.

MAKAKA — Nen N ka ta obi fladu ma bu kóre dianti di bu koléga! Kel go… N ta dexa di kusia pa N po-u na pratu pa bu kume.

MAKAKU — Tanbe bu ka ta obi. Bu ka meste nen fadiga.

MAKAKA — Ka bu buska. Mas si bu buskadu… bu da-s.

MAKAKU — Kel-li bu ka meste ki manda-m. Dja djugadu Nhordes ka ta durmi ku tudu dos odju fitxadu omesmu tenpu. (E ta sai pa un ladu, Makaka ta sai pa kel-otu).

II SÉNA / ES DOS OTU BES

Makaku ta torna txiga kasa ku língua fora’l, ta tenta ngatxa tras di Makaka.

MAKAKA — Otra ves?! Onti bu txiga-m li ku odju fóra kabésa. Oxi dja bu torna ben, ku língua kuazi ta rasta na txon…

MAKAKU — N ta spéra ma bu ka ta skese di kusa ki nu papia.

MAKAKA — Ki kusa?

MAKAKU — Ma bu ka ta skese di bu purmésa.

MAKAKA — Di nha purmésa?

MAKAKU — Dja bu skese kuse ki nu papia onti?

MAKAKA — Di na kadiâ ki N fla ma N ta bai djobe-u?

MAKAKU — Ma bu ta leba-m kafe, almusu, djanta.

MAKAKA — So ma dja bu ka dexa bu sotadu!

MAKAKU — E sa ta pirsigi-m, mas kel diâ ki Nhordes kansa e ta odja. E ta paga-m ku juru ku-tudu.

MAKAKA — Bu ten ki tra-l di bu kontu pa bu mostra-l ma bo é matxu sima el… o más di ki el.

MAKAKU — E sta armadu en mondon…

MAKAKA — Bu ten ki mostra-l ma mondon ka ten, i ma balenti é ka so el. Finka pe na txon bu ratxa-l kel kau. Si kazu da ki bu bai kadiâ, N ta ranja divogadu N ta bai tra-u.

MAKAKU — Nha medu, kirida, é si N bai kadiâ pa bu fika li bo-so… ku kes un-munti makakus otrevidus ki ten pa li… alguns divogadus tanbe.

MAKAKA — Bu ka meste fadiga. Dja N pode da nha kabésa kumida i N sabe libra di makakisas di tudu makakus ki ten pa li.

MAKAKU — I di divogadus… tanbe bu sabe libra? Odja ma ta fladu ma es é mintrozu!

MAKAKA — Sikre es é mintrozu. A-mi é feru kuradu. Mintira ku makakisa ka pode ku mi.

MAKAKU — Nen divokakisa ka pode ku bo?

MAKAKA — (ta djobe-l tan) Divokakisa?!

MAKAKU — Aian. Divokakisa di kel makaku… di kel divogadu ki bu fla.

MAKAKA — A-bo, prajá, é siumus ki bu tene.

MAKAKU — Bu ka kre pa N tene siumus? Bu kre pa N dexa-u pa bu kanpia sima bu kre!

MAKAKA — Larga-m da mo. (E ta labanta pa e sai Makaku ta pega-l na mo, ta tene-l).

MAKAKU — Obi un kusa li: oxi N kre pa bu da-m un djanta raforsadu, pa N manxe manhan gordu, ku forsa, pa N pode  ratxa-l panderu sima N ta kre… sima e ta merese.

MAKAKA — Mamodi?! Bu fla djanta…?

MAKAKU — Raforsadu.

MAKAKA — Raforsadu inda pur-sima?!

MAKAKU — Bo bu ka fla-m pa N ratxa-l kósta?

MAKAKA — N fla-u pa bu ratxa-l kósta. N ka fla-u pa bu djanta.

MAKAKU — I modi ki N ta ten forsa pa N lonba-l si N ka djanta?

MAKAKA — Okei. Mas ku kuse go ki N ta kusia?! So si dja bu kre bai rinka algun pe di mandióka na un órta kualker, bu tarse-m… N ta kusia.

MAKAKU — Náaa… mi mandióka gosi N ka sa ta bai rinka. Sima N sta kansadu li! Kaba, N ka sabe nen si si donu ka sta la xintadu!

MAKAKA — Kansadu?! Kel-li é diskulpa ki bu kre da! Bo ki ka ta kansa bu korpu?! Bu ka gosta di trabadju!

MAKAKU — N ka ta gosta di trabadju!!! Pur-isu ki ale-m ta libra pa N ka kai na prigu… pa N ka bai kadiâ, pa bu ka móre ku fomi.

MAKAKA — A-mi… móre ku fomi?! Si bo… mi ki ta sustenta-u!

MAKAKU — Ka bu xatia-m. Bo ki ta sustenta-m! Ala-m ku fomi li! Si é bo ki ta sustenta-m, nton da-m kumida.

MAKAKA — Nton bai kume bósta si bu kre manxe gordu manhan.

MAKAKU — Bai kume bo purmeru. Bo ku bu familia ki kustuma kume bósta ta lenbe bexu.

MAKAKA — A-bo é uniku na nha família ki ta kume bósta. (E ta sai, Makaku ta fika detadu di kósta).

III SÉNA / ES ME

MAKAKU — (ta rabenta pórta ta kanba, ta stila na meiu di kasa ta geme) Ñoi, ñoi, ñoi. Ñoi, ñoi, ñoi. Ñoi, ñoi, ñoi.

MAKAKA — Dja bu panha-l, maridu? (E ta pega naris) Diaxi-nho! E nbosta-u fepu. Xinti modi ki bu sa ta txera fedi!

MAKAKU — Ñoi, ñoi… e ka fika ta debe-m nada… nadinha e ka fika ta debe-m. Ñoi, ñoi… ka dja N flaba bo? N panha-l sen e spéra. Sinhor porku. Ñoi… e nbosta-m moku.

MAKAKA — Isu mesmu! Pa bu mostra-l ma bo é más matxu di ki el! Ma bu ka ta kume porkariâ i nen na ka kusta. Bu ta kume na forsa’l bu brasu, na soris di bu tésta, ku sabor di ténpra di bu mudjer. Pur isu, bu ta kume dretru, o-ki bu kre i kel ki bu kre.

MAKAKU — Sinhor porku… ñoi, ñoi… so si bu odja, mudjer; ñoi, ñoi… e nbosta más pior ki baka. Kaba e ta da pa katxor… e ta arma en bazofu. Porku ki el é!

MAKAKA — Anton éra katxor ki sa ta xatiaba bo bida?

MAKAKU — Kel-la é ka katxor. Si nomi éra pa serba porku. Ñoi, ñoi, ñoi… bósta ta txera fedi ki bu ta pensa bósta lagaia.

MAKAKA — Oxi bu sta di parabens. Dja bu prova-l ma bo é matxu dimé-divéra. Agó, falta mi pa N bai fase nha párti. A-bo dja bu da-l na kel kau… dja bu tra-l bósta, dexa-m mi go N bai nxina-l modi ki ta nbostadu… N bai tra-l di porkariâ.

MAKAKU — Modi propi, mujer?

MAKAKA — N ta bai pila sal ku malgéta, musturadu ku vinagri nu ta bai po-l na bósta pa arde-l kadera.

MAKAKU — Ñoi, ñoi… bu pode bai ta purpara timenti N ta diskansa un-kóxi… ñoi, ñoi… kel-o-ki dja bu sta prontu… ñoi, ñoi, ñoi… bu ta korda-m nu ta bai salga-l patrás.

MAKAKA — Purbeta bu bai toma un banhu faxi, timenti N ta purpara-l dóza.

MAKAKU — Ñoi… Ñoi… ñoi, ñoi, ñoi. Banhu?!

MAKAKA — Sin, omi. Timenti N ta purpara dóza.

MAKAKU — Banhu gosi N ka ta toma. Ti manhan… o-ki dja N diskansa purmeru… ñoi… N ta kunsa toma un bon banhu.

MAKAKA — Ti manhan?!

MAKAKU — Kirida, N tene korpu inkenti… ñoi… si N toma banhu gosi, ku águ friu, pode da-m febri pineumoniâ.

MAKAKA — Febri pineumoniâ?! Águ friu?! Bai pega lumi la kintal bu kenta águ.

MAKAKU — Sima N sta kansadu li, kirida?!

MAKAKA — Si bu ka toma banhu, oxi bu ka ta deta li, djuntu ku mi riba’l kama.

MAKAKU — Si é pa N toma banhu gosi-li, nton N ta purfiri deta na txon, li-sin undi N sta. (E ta djobe paMakaka ku kara di poka-burgónha) Bu ta ben deta li ku mi? (E ta deta di kósta, e ta poi pe un riba di otu e ta fika ta geme. Makaka ta purpara sal ku malgéta, ta poi nun tijéla es ta da rinkada).

IV SÉNA / ES ME

Dianti di un-munti piloru’l bósta, Makaka sakedu ku tijéla na mo.

MAKAKA — (ku naris tapadu ku algudon) Fogu!!! Fórti bósta! Dios sabe dretu kuse ki e ta fase. E po-l bon nomi: “Katxor!”

MAKAKU — A-bo inda bu odja so kel-li pamodi e konsigi kapri-m e sota skarera. N da si trás pa N bota-l mo, mas… e ta koreba skarera… ki N ka pega-l.

MAKAKA — Kel ki dja bu da-l li tanbe… parse-m ma txiga-l. Ka mesteba más ki si.

MAKAKU — Mas sikre. Si N daba el más un-kusinha inda ka éra nada mal.

MAKAKA — Bo tanbe… bo é mutu runhu. Inda bu kre traba el más bósta di ki kes-li?

MAKAKU — Mi si éra pa mi N ta dispixaba el tudu bósta di dentu’l tripa. (Es ta ri).

MAKAKA — Go nu ben komesa tenpra-l furinhu, li di kel-li. (E ta panha un mo di sal ku malgéta, e ta nbaxa pa e poi na purmeru munti’l bósta).

MAKAKU — (ta salta si dianti) Pára! Kel-li… kel-li parse-m ma é di-meu… pamodi ten un, ki pelu-menu… N sa ta lenbra ma é di-meu.

MAKAKA — (ta bai pa más un munti di bósta) Kel-li go é di-sel…

MAKAKU — Kel-li… kel-li parse-m…  parse-m ma… pára si: kel-li tanbe… nau. É… é… é di-meu. Bu ka rapara ma é pokuxinhu! Di-sel é tudu más txeu… más kakuladu.

MAKAKA — (ta volta pa skerda) É kel-li go! Kel-li é propi di-sel. Sa ta txera mutu fedi.

MAKAKU — Dexa N odja. Kel-li tanbe… é di-sel, sin, sinhóra. (Makaka ta bai pa poi ténpra e ta pega-l na mo) Mas dexa-m sertifika. Kel-li tanbe… ta parse ku di-meu! Mas… aian, tanbe é di-meu. Gosi ki N lenbra. É kantu N pega-l, ku kel reiba ki N teneba, sima N bota-l mo… kapri-m. Dja N skeseba dja.

MAKAKA — (ta volta pa ndreta) Kel-li go é propi di-sel! Odja li…

MAKAKU — Dja N odja.

MAKAKA — Nton, dexa N xobra-l ténpra.

MAKAKU — Kel… li! kel! kel-li! kel-li tanbe… é di-meu. É kel-óra ki N perta-l na paredi, sima N siridja-l biku, lolo-m flé.

MAKAKA — (ta da dos pasu pa frenti) Agora sin. Kel-li go é di-sel sen dúvida. Odja modi ki sta so kaska mangi! (E ta panha un mo di sal ku malgéta pa e poi).

MAKAKU — (ta da un saltu ta pega-l na mo) Altu! Spéra N odja. Dexa-m konfiri purmeru, bu ta kunsa poi ténpra dispos. (E ta nsolbe ar) Nau… bu pode poi. (Makaka ta nbaxa pa poi, e ta pega-l na mo) Dexa-m torna berefika más un bes… (E ta torna nsolbe ar) Kel-li tanbe é di-meu. Kel-li é sima N da-l purmeru kéda, ku tudu forsa musturadu ku reiba… N da-l un buló ku dos kamalhóta omesmu tenpu… skapa-m.

MAKAKA — (ta volta otu bes pa ladu) É kel-li, nton. Kel-li go é propi di-sel. Ti si txeru é igual ku txeru ki bu tene na korpu.

MAKAKU — Kal? Dja N fla-u so pa bu ka poi timenti bu ka dexa-m odja purmeru. (E ta nbaxa, e ta kóre dedu na bósta e ta txera) Pois! Kel-li me… (e ta torna nsolbe ar) tanbe é di-meu. Kel-li é kantu N da-l sugundu kéda, mi riba del N ta pila, N dexa sai di kaloti.

MAKAKA — Afinal-di-kónta, kusas nton é so di-bo, mintrós!

MAKAKU — É pa N fla-u? Ka dja bu sabeba ma éra so di-meu? Ki tenpu ki bu odja makaku sota katxor? Al serba so mi! Inda kaba sen rezon.

MAKAKA — (ta da-l ku tijéla) Mintrozu, kobardu, trafudjon, porku, katxor, lagaia, sen burgónha, mizeriadu, stapor, palérma.

V SÉNA / MAKAKU KU MAKAKA

Ta sta detadu.

MAKAKA — Maridu, maridu, (e ta sukudi-l, ta grita) NHA MARIDU.

MAKAKU — (ta dispirgisa) Nnnnn!

MAKAKA — (ta da-l uns palmadinhas) Korda. Korda N meste papia ku bo.

MAKAKU — Dexa-m djongo más un-koxinhu, mudjer.

MAKAKA — N meste papia ku bo.

MAKAKU — Bu pode papia N ta obi ku obidu. N ta fitxa odju mas N ta dexa obidu abertu.

MAKAKA — Nau, sinhor. Kel-li é falta di poku ruspetu. Ragala odju bu djobe-m dentu rostu… (E ta abri odju kuazi bésgu, so sonu) i abri obidu bu sukuta-m.

MAKAKU — Okei. Bu pode sura N ta prende.

MAKAKA — Kenha ki bu sa ta manda pa sura? Ki ta sura é buru sima bo, o bu madrinha, nton. A-mi N ka buru, N ka bu madrinha. Mi é un makaka idukadu i intilijenti.

MAKAKU — Aian, sinhóra intilijenti. É kuse ki Makaka kre?

MAKAKA — É pa N fla-u ma dja N sta fartu di mora na rótxa… ma N ka sa ta saporta odja kel gardion di katxor tudu santu diâ.

MAKAKU — Kuse ki dja da-u na kabésa, Makaka?

MAKAKA — Nada ka da-m na kabésa. So N ka kre mora más li fóra, nen na kel rótxa li.

MAKAKU — Kirida, a-nos nu nâse li na rótxa, nu kiria li na rótxa; nos pai ku nos mai, nos donu ku nos dóna, nos busdonu ku nos busdóna, nos trisdonu ku nos trisdóna, ets. nâse, kiria, mora i móre li na rótxa; li ki es pari-nu, ki es kiria-nu ti ki es bira bédju…

MAKAKA — Mas, tenpu muda, kiridu. I pamodi ki nos nu ka ta muda?

MAKAKU — Modi ki nu ta muda? O midjor: pa undi ki nu ta muda, kirida Makaka?

MAKAKA — Pa Sidadi Kapital. Labanta bu bai djobe un kasa pa nu kunpra pa nu muda. Dja N nfâstia di mora li fóra, i na kel porkariâ di rótxa li, inda, sima ki ka txiga, N ten ki saporta kel bizinhu katxor, ki nen N ka gosta del.

MAKAKU — Bai mora na Sidadi… a-nos? Makaaaka!!!

MAKAKA — Si bu ka kre… nu ta divôrsia, N ta ranja un otu makaku ki ta ruspeta-m… ki ta obudese-m.

MAKAKU — Okei. Mas, lenbra ma rapasinhus di Sidadi é so xuxanti, es ta bai goza ku nos. O dja bu skese ma nos é makaku?

MAKAKA — A-nos é makaku, sin, sinhor, mas tanbe nos é fidju di Dios sima es. Nu ten omesmu diretu.

MAKAKU — I kenha é nos pa nu iziji nos diretu?

MAKAKA — A-nos é makaku sima un-munti otus é.

MAKAKU — Mas es, es ivului, kirida.

MAKAKA — Es dexa, é di anda ku mo na txon sima bakinha, o midjor, sima makakinha. So kel-li. Du-restu kusas ki makakus ten, es fika ku el sima sta, moku-kafika.

MAKAKU — Makaka, makaka! Parse-m ma inda es ta rinka-bu denti ku rabarbadora.

MAKAKA — É gosi li ki é altura di nu purbeta.

MAKAKU — Pa es rabarbadora-u denti?

MAKAKA — Dexa di palhasariâ. N sa ta papia ku bo na sériu.

MAKAKU — Nton mi N ka sta na sériu?

MAKAKA — Ileison sta kuazi ta txiga.

MAKAKU — I kuse ki nos nu ten a-ver ku ileison?

MAKAKA — Nu ten tudu a-ver. Ninhun des é ka más di ki nos.

MAKAKU — Ka bu fla-m ma dja bu bira pulítika i ma bu tene kalku na ser prizidénta?

MAKAKA — Si N ser prizidénta é ka tortu é ka rabes. Kel ki sta la é ka más midjor di ki mi!

MAKAKU — É ka tortu, é ka rabes. É inposível.

MAKAKA — Na altura di ileison nada é ka inposivel.

MAKAKU — Nton, bu tene kalku na ser Prizidénta, me?

MAKAKA — Bo N ta papia ku bo Piku, bu ta ntende Santana!

MAKAKU — Bu fla ma é normal si bu ser Prizidénta…!

MAKAKA — Mas a-nos, nu sa ta papia di kunpra kasa… o midjor, di ranja un kasa na Kapital.

MAKAKU — Ago dja N ntende más omenus.

MAKAKA — Na altura di ileison, kusa ki bu kre bu ta konsigi. Ki basta bu papia ku Prizidenti, bu fla-l ma bu ta djuda-l fase kanpanha, ma bu ta vota nel, é ta ranja-u un kasa na zóna “xiki” di Sidadi: na Prainha, o na Sidadéla, o na Plateau.

MAKAKU — “Plateau?” Kuse ki é “Plateau”?

MAKAKA — Buru, asnu, analfabetu. Kaba bu ta da pa makaku! Buru mas é u-ki bo é. “Plateau”, ker-dizer dentu di Kapital… riba di sidadi.

MAKAKU — É “Plato” ki ta fladu, Makaka. Ki siginifika — sima bu fla me — sentru di Sidadi.

MAKAKA — U-ki sta skrebedu é “Plateau”.

MAKAKU — Sta “Plateau”, mas ta ledu “Plato”. É franses.

MAKAKA — Ñeeee! Kre bu kre intxi franses di bésta?!

MAKAKU — Ok. Mas, Makaaaaka! Bu ka sa ta sunha altu dimás?

MAKAKA — Bo ki sa ta sunha baxu dimás. Si Txiku Kunba flaba nos ma un diâ e ta benba ser sugundu xefi na Sidadi di Santu Krusufiksu… nu ka ta setaba.

MAKAKU — Aian. El éra makaku sima nos. Éra nos bizinhu.

MAKAKA — E nâse, e kiria ti ki e da omi li na rótxa Kunba, djuntu ku nos. Si pe ka konxeba nen sapatu.

MAKAKU — Si pe ka konxeba otu kusa ki ka pitxóka.

MAKAKA — Pe di pitxóka, koserinha na korpu, ranhu na narís, dodó ku petxeku na odju.

MAKAKU — I gosi e ta pasa na nos nen mo e ka ta labanta-nu, kifari pa e ri ku nos.

MAKAKA — É so pa bu odja ma nos nu sa ta durmi na fórma.

MAKAKU — Ti giâ e sa ta giâ.

MAKAKA — I e ta durmi ku Pradu na pórta si kasa sima-kusa ki é di-sel.

MAKAKU — A-mi tudu bes ki N ta volta di nhas makakisadas di noti, as-tanta di mardugada, N ta atxa si Pradu, diskulpa-m, Pradu di Sidadi paradu na pórta di diskotéka.

MAKAKA — Nton dja bu sa ta odja? I nen e ka tenba mutu skóla.

MAKAKU — E ka sabeba nen papiaba dretu!

MAKAKA — Pelu-menu kantu el éra nos bizinhu e ka tenba skóla.

MAKAKU — Mas fladu ma e studa… ma pelu-menu e bai skóla. Ma e linha ku rapaziada, e studa na skóla di rapaziada i tudu anu es da-l un diplóma.

MAKAKA — A-el é makaku más sortiadu ki dja N konxe.

MAKAKU — Fladu ma ti na Fakuldadi e sta. Karagadu difikuldadi ta kursa Sosiolojiâ. Ma dja e ten sais anu na purmeru anu inda.

MAKAKA — Nton el é kontinua kuazi makaku na mesma. E ka ivului txeu. Sais anu so pa e le un livru?!

MAKAKU — Ki e sta bazofu! Fladu ma gosi e sa ta papia so di Interneti ku nóva tekinolojiâ. Ma e fla ma gosi eta obi notisiáriu purmeru na e-mel, dispos e ta odja na Interneti, kaba e ta guarda pa “ku duru” di konputador pa ka gasta lus txeu.

MAKAKA — Koitadu! E sta ratorku ki ta kudadu ma el e donu di mundu!

MAKAKU — Fladu ma e sa ta sai tudu kau e ta fla ma Sidadi é el.

MAKAKA — Tolobasku. N kuda ma dja e kuraba si dodisa!

MAKAKU — E bira pior. Bo bu ka sabe ma poder ta tolobaskiâ algen?! Gosi dja e debe skese di tudu makakus ku makakadas.

MAKAKA — E ta skese di makakada?! Bu sta na brinkadera! E pode skese di nos, makakus… tudu dretu. Mas, di makakada… djuntu ku rapaziada?! ka parse-m. E ta prende inda kada bes más i ku mutu más midjor jinga-joga. (Es ta ri, es ta nbarsa kunpanheru) I afinal, bu sa ta bai Kapital djobe kasa o nau?

MAKAKU — N sa ta bai sin, sinhóra.

MAKAKA — Skodje un bonitu.

MAKAKU — Na pundi ki bu kre pa N skodje? Na Plato, na Prainha o na Sidadéla?

MAKAKA — Dásdi ki é grandi i bunitu… ki ten spasu verdi, ku pisina, ku ar kondisionadu i un mutor di lus partikular…

MAKAKU — Kon serteza, nha kirida. Un mutor di lus partikular é purmeru kusa. Bu sabe ma Ilétra é ka di kunfiansa.

MAKAKA — Inda ben ki bu ka buru. É ka pur-si ki txeu algen ta txoma-l di skuréta.

MAKAKU — (ta da un grasa) I presu… si for mutu karu?

MAKAKA — Purmeru bai tenta pidi sinhor Prizidenti di Sidadi un. Fla-l ma nos é si fan, ma nu ta fase kanpanha pa el i ma nu ta vota na rapaziada.

MAKAKU — Mas, a-mi… mi ningen ka konxe-m…! Sinhor Prizidenti ka sabe nen mi é kenha!

MAKAKA — (ta pintxa-l) Bai la so. E ka meste ki konxe-u. U-ki e kre é makaku pa vota na el i más nada. Mas odja li: skodje kasa ki ten Interneti sen fiu i ki ten e-mel. Txiku é ka más midjor ki nos.