Politu - Sestu párti Sunday, 11 March 2012 Written by Armindo Tavares

Nha bodi, bai txoma Béba pa ben rusponde. Si bu ka atxa-l la na kasa, bai djobe-l la Reia-grandi o la Rubon Baliâ. E dede sa ta djuda piskadoris puxa redia, o rasta lantxa pa e fandata algun rabisku pexi.

IV SÉNA / Dra. MÓNIKA KU Dr. DJOKIN

Na kuartu di Dr., Drª. ta sta sakedu ku mo diskansadu na onbru di un kadera. E ta odja kordon di Dr. riba di bankinha.

Dra. MÓNIKA – N ten un fiu ki ten un midália sima kel-li na el, ku fotu ku-tudu.

Dr. DJOKIN – Sima di-meu?!

Dra. MÓNIKA – Ka tra ka poi. So kordon ki é diferenti. Di-meu é un-kusinha más gros. Mas retratu ku midália é kel-me.

Dr. DJOKIN – Dexa di brinkadera!

Dra. MÓNIKA – Spéra N bai buska di-meu N ben mostra-u. (E ta sai ku présa e ta volta ku di-sel e ta longa Dr.) N ka fla-u? Sapa djondjo.

Dr. DJOKIN – Napundi ki bu kunpra di-bo?

Dra. MÓNIKA – Nha mai ki po-m el na piskos kantu N ta ben, pa N rakorda del timenti N ka bai.

Dr. DJOKIN – Di-meu tanbe é nha mai ki da-m, e fla-m ma óras ki N txiga li pa N po-i na piskos, pa N fika ta lenbra del.

Dra. MÓNIKA – Ki konsidensia?!

Dr. DJOKIN – Retratu ku midália… igual?!

Dra. MÓNIKA – Debe ser algun famozu di ses tenpu… sima Ozébiu, Pelé, Rubertu Karlu, Xarló…

Dr. DJOKIN – Ka sta-m.

Dra. MÓNIKA – Ka sta-u? Pamodi?

Dr. DJOKIN – Manhan nu ta tra próva. Bai deta bu diskansa… manhan nu ta ká konbersa.

Dra. MÓNIKA – Bu kre po-m na ruâ di bu kuartu?

Dr. DJOKIN – Kel-o-ki nu bai kebra-djudjun, nu ta tilifona nos mai nu ta purgunta-s napundi ki es kunpra-s.

Dra. MÓNIKA – Dja N fla-u ma letratu debe ser di algun algen famozu ki es éra si fan.

Dr. DJOKIN – Nha korason sa ta fla-m ma algun kusa ta liga-nu mi ku bo.

Dra. MÓNIKA – Klaru ki ta liga-nu; nton nos korason ka dja paxona pa kunpanheru? So si bu kre ranja truki pa nu sipara.

Dr. DJOKIN – Karanba nho! Nu ten o’mesmu idadi mi ku bo, nu fase o’mesmu kursu, nu tene o’mesmu distinu… o’mesmu amor! Inda pur-sima, ti nos mai ku o’mesmu gostu?! Ka pur-si. Ten algun segredu.

Dra. MÓNIKA – So ka bu fla ma nos é armun... gémia ku kunpamheru.

Dr. DJOKIN – N ka ta fla nada inda ma nu ka é.

Dra. MÓNIKA – N ka ta seta ma bo é superstisiozu ti ki bu ta ndjeta amor di un rapariga.

Dr. DJOKIN – Nau, Mónika. N ka sa ta ndjeta bu amor. N gosta di bo... ki so Dios ki sabe. Sima N gosta di nha kabésa. Mas nu aguenta pelu-menu ti manhan… nu tra konkluzon purmeru.

Dra. MÓNIKA – N ta farta-u korason vontade… mas akridita ma N sa ta butuperia di-meu.

Dr. DJOKIN – Pursebe-m di-zimóla.

Dra. MÓNIKA – (ta da dos pasu pa sai, ta torna volta) Es noti sa ta bai sai-m noti más grandi di tudu nha bida.

Dr. DJOKIN – Mi me tanbe!

Dra. MÓNIKA – Txau.

Dr. DJOKIN – Manhan oitu óra nu ta kontra na rastoranti.

Dra. MÓNIKA – Ti manhan nton.

Dr. DJOKIN – Kel-o-ki nu kaba kebra djudjun, nu ta bai tilifona.

Dra. MÓNIKA – Ten ki ser di palmanhan pamodi di tardi N kre bai Praia, pa N bai kadiâ sibil ter ku nha klienti.

Dr. DJOKIN – Okei. Txau.

Dra. MÓNIKA – Txau. (E ta sai tristi).

V SÉNA / Dr. DJOKIN, Dra. MÓNIKA, ALSINDA, BÉBA, PEDRINHU

Na rastoranti, Dr. ku Drª. xintadu na mésa ta konbersa.

Dr. DJOKIN – Pois Mónika, N durmi-u prokupadu pamodi di kel asuntu.

Dra. MÓNIKA – A-mi tanbe kuazi N ka prega odju.

Dr. DJOKIN – So nu kaba kebra djudjun nu ta bai tilifona.

Dra. MÓNIKA – Bu ka ta imanjina modi ki N sufri!

Dr. DJOKIN – Bu ka meste konta-m, pamodi di-mi ku bo staba klonadu. Tudu kel ki bu xinti, N xinti tanbe di-serteza.

Dra. MÓNIKA – N studa kantu bes na bai konko-u na pórta… mas koraji ka da-m.

ALSINDA – (ta bai pa es) Bondiâ nhu sinhor Dotor ku nha sinhóra Dotóra.

Dr. KU Dra. – Bondiâ.

ALSINDA – Nhos ta da-m un lisensinha pa N pasa-nhos panu na mésa pa N ben poi-nhos kebra-djudjun?

Dr. DJOKIN – Nha pode linpa avontadi. (Alsinda ta linpa mésa, ta bai ta ben ku un trabésa ku kebra-djudjun na el. Dr. ta abri si pasta, ta tra un masu sigaru ku un fuzil, ta pega ta fuma. E ta poi masu riba’l mésa, Mónika ta panha, ta tra un, ta pega ta fuma. Es so na kume, Pedrinhu ta kanba ku si kaxa di graxa, ta poi na txon na pe di mésa, ta xinta riba del, na ladu di Dr., e ta skoba-l sapatu. E ta skoba di un ladu, e ta torse-l pe pa e skoba di otu ladu, Dr. ta da kónta, ta bira pa el meiu sustadu) Kuse ki bu sta na el, rapasinhu?

PEDRINHU – N sa ta ngraxa-nho sapatu. Nha korason da-m ku di-nho… N sa ta ngraxa-nho el. Nhu ka meste ki paga-m.

Dr. DJOKIN – (pa Mónika, dispos pa rapasinhu) Odja li, Mónika… un rapasinhu!

Dra. MÓNIKA – Eh! Si sangi dja da ku bo. A-bo bu sabe ngraxa, rapasinhu?

PEDRINHU – N sabe sin, sinhóra

Dra. MÓNIKA – Pamodi ki bu ta ngraxa? Bu ka sta na skóla?

PEDRINHU – Nha mai ka pode po-m na skóla.

Dr. DJOKIN – E ka ta trabadja?

PEDRINHU – E ta trabadja li na rastoranti, ta sirbi di kiriada.

Dra. MÓNIKA – Nton pamodi ki e ka ta po-u na skóla? El é ka ta nganha?

PEDRINHU – E ka ta pagadu. E ta da-du so bokadu di kumida o-ki resta di mésa, e ta bai ku el kasa nu ta kume. Sima N ta ngraxa li go, N ta nganha algun tiston ki nu ta kunpra otu kusa, sima fos, ku pitroli, ku sal, ku sukri, ku kafe…

Dr. DJOKIN – Modi ki bu txoma?

PEDRINHU – Pedrinhu.

Dra. MÓNIKA – I bu pai… ka ta trabadja?

PEDRINHU – Nha pai N ka konxe.

Dra. MÓNIKA – Pamodi ki bu ka konxe-l? E ka ta sta li? E ka ta mora ku nhos?

Dr. DJOKIN – Ka ta purgunatadu kiriansa kel tipu di purgunta li. Asves si pai pode ser algun…

Dra. MÓNIKA – Ka ten mal ninhun. Seja u ki e for, é si pai. I mininu ka pidi-l pa e pari-l.

PEDRINHU – Nha pai sta na kadiâ.

Dr. DJOKIN – Dja bu sa ta odja?

PEDRINHU – Kantu N nâse dja e staba prezu…

Dra. MÓNIKA – (ta kontra odju ku odju ku Dr.) Bu ta diskulpa-m, mas N ten ki purgunta-l. (Pa rapasinhu) Bu mai ka ta bai djobe-l na kadiâ… nhos ka ta bai bizita-l?

PEDRINHU – La undi e sta é lonji, nha mai ka ten dinheru pa nu paga barku pa nu bai djobe-l.

Dr. DJOKIN – (ta tenta disviâ konbersu) Inda bu ka kebra djudjun?

PEDRINHU – Inda nau. Kel-o-ki tudu algen dja kaba kume, nha mai ta djunta kel ki resta, e ta txoma-m la kusinha nu ta bai kume mi ku el. Mas e óras ki tudu algen dja kaba kume... si resta.

Dr. DJOKIN – (ta puxa un kadera ta koloka na mésa) Xinta li, bu kume ku nos.

PEDRINHU – (ta panha dos bokadu, ta da ku odju na piskos di Dr.) La na kasa mamá ten un letratu sima kel-la.

Dra. MÓNIKA – Sima kál?

PEDRINHU – (ta spiâ pa piskos di Dra.) Sima kel di-nha la tanbe.

Dr. DJOKIN – (ta txoma Alsinda, es ta ngatxa midália pa retratu ka parse) Ei, sinhóra. Nha ben li di favor.

ALSINDA – (pa Pedrinhu) Ah nha fidju, a-bo lovar-a-dios! Pa bu ta da ku tudu algen si?

Dr. DJOKIN – Pamodi ki nha ka ta po-l na skóla? Rapasinhu spertu di kel-li?!

ALSINDA – N ka ten pusubilidadi. A-mi é pobri, sen nun rakursu, si pai sta prezu dasdi anti e nâse… mi so N ka ta pode da-l skóla... pa más ki N kati-kati.

Dra. MÓNIKA – Nha ka ten más ningen ki pode djuda-nha?

ALSINDA – Nha fidju, a-mi é txaskan mi ku kel mininu li. Si pai dja bai kadiâ dos bes. Purmeru bes, e dexaba mi ku dos fidju pikinoti. Un matxu ku un fémia. Kel matxu ki éra más grandi, gosi sta na si kasa moradu ku si mudjer, ku difikuldadi tanbe sima mi me. Kel fémia ki éra más pikinoti, un sinhóra pidi-nu el, bai ku el Lisboâ, nunka más ka ben, ka skrebe, ka manda rekadu kifari pa manda algun kusa. Nu ka sabe si e sta bibu, o si e sta mortu. Si e ka móre dja e debe dja da mudjer.

Dr. DJOKIN – Pamodi ki maridu’l nha dja bai kadiâ dos bes?

ALSINDA – Nha maridu sai di kadiâ un diâ, dispos ki e kaba kunpri kinzi anu ki es daba el, kel-otu diâ es torna prende-l dentu si kasa, el ku otrun si fidju más grandi. Dios merese-nu, kel un mumentu ki nu pasa djuntu dispos di kinzi anu, N fika prenha di kel rapasinhu li, ki sa ta ben fase séti anu.

Dra. MÓNIKA – É so kel-li ku kel-otu ki sta moradu na si kasa ki é fidju ki nhos fika ku el?

ALSINDA – Ker-dizer, a-mi sin. Mas el na si tenpu éra mudjeristu. Tantu ki, kel di-meu ki kel sinhóra bai ku el Lisboâ, es éra tres di se-l ki nâse na mesmu anu.

Dra. MÓNIKA – Kes-otu dos napundi ki sta?

ALSINDA – Un matxu, ki txomaba Punoi, rapasinhu bunitu, ben bira ta bebe txeu, ta droga, ti ki móre ku kel duensa ki sa ta da gosi, ki fladu ma ka ten kura. E more rapasinhu-nobu... ku si katorzi pa kinzi anu. E txomaba Punoi.

Dr. DJOKIN – Ku katorzi anu dja e sa ta fumaba dróga?

Dra. MÓNIKA – Kiria lonji pai...!

ALSINDA – Ta fumaba, ta bebeba. E ben djunta ku un rapariga ki rapatiadu di Mérka... ki ta fumaba kel porkariâ... fladu ma pega-l duensa... es móre un tras di kel-otu.

Dra. MÓNIKA – Nha ka flaba ma e tinha si katorzi pa kinzi anu?

ALSINDA – Rapariga ta serba si mai prontu. Ta lebaba el más di vinti anu.

Dra. MÓNIKA – El éra fidju di kál di nhos?

ALSINDA – Si mai txomaba Biâ. El ki éra mudjer di dentu'l kasa.

Dra. MÓNIKA – Pamodi ki nha fla ma e txomaba Biâ?

ALSINDA – Gosi dja e móre.

Dra. MÓNIKA – Ah nha genti! Kuse ki mata-l? E duense?

ALSINDA – Aian. É móre ku kel moléstra mufinu. Senpri ta rueda ma e ta andaba ku Politu mariadu, kantu ki Politu bai kadiâ pa sugundu bes, e lansa na mau bida klaru, e panha duensa’l mundu, fladu ma e ben prenha, ma e bai ferbe dinheru-bedju pa e bebe pa e bota-bariga, ma da-l murujiâ di sangi e móre.

Dr. DJOKIN – I kel-otu fidju?

ALSINDA – Djokin? El tanbe e bai pa Angola na mesmu anu ki di-meu bai Lisboâ.

Dr. DJOKIN – Kuse ki maridu nha fase ki e bai kadiâ otu bes?

ALSINDA – Pamodi suspeta di un mudjer ki parse mortu dentu’l kasa.

Dra. MÓNIKA – Es ten próva ma é el ki mata-l?

ALSINDA – Próva ka tendu. So ki mudjer ki parse mortu éra kel ki poba el na kadiâ purmeru bes.

Dr. DJOKIN – (pa Drª) Spéra, Dotora. (Pa Alsinda) I kel-otu si mai di fidju?

ALSINDA – Béba? El é otrun koitadu. E mai di kel ki N fla-nhos ma bai pa Angola.

Dr. DJOKIN – I a-el napundi ki e sta? Ka ta da pa nha manda txoma-l?

ALSINDA – (pa Pedrinhu) Nha bodi, bai txoma Béba pa ben rusponde. Si bu ka atxa-l na kasa, bai djobe-l la Reia-grandi o la Rubon Baliâ. E dede sa ta djuda gentis puxa redia, o rasta lantxa pa e fandata algun rabisku pexi. (Pedrinhu ta sai na skarera) Ultimamenti es ben ranja-l un trabadjinhu na Kánbra pa e ta bare ruâ di mardugada, di duas óra pa sais óra di palmanhan. Ta da-l pa di bes enkuantu e kunpra un mo di aros.

Pedrinhu ta txiga el ku Béba.

Dr. DJOKIN – (ku un kalma forsadu, ta txoma Béba) Nha ben xinta li. (E ta tene un kadera purparadu na mésa).

BÉBA – (korpu ta treme) Oh nha fidjus, pake ki nhos meste-m? Pedrinhu fla ma nhos é dos dotor... N fla ma N ta pidi-nhos algun pomada di firiésa.

Dr. DJOKIN – Nha xinta purmeru. (E ta labanta e ta djuda-l xinta).

BÉBA – (ta xinta strobadu, ta kexa dor di ramatismu) Ui, ui... Firiésa ku ramatismu sa ta kaba-m ku duedju. Nhos raseta-m algun ramedi.

Dra. MÓNIKA – A-nos nu ka médiku nau, Nha Béba. A-nos é dotor di lei.

Dr. DJOKIN – É nha ki ten fidju ku un sinhor ki sta prezu.

BÉBA – Politu? Ki sta prezu la Sonbisenti?

Dra. MÓNIKA – E sta na Praia.

BÉBA – Dja e ben Praia?! E ka sta na Sonbisenti más?

Dra. MÓNIKA – Dja ten un sumana ki e sta la kadiâ sibil di Praia, el ku si rapasinhu.

BÉBA – (ta dizafia Alsinda) Ma bé Alsinda, pa bu ka manda fla-m ma Politu ku Danilsu dja ben di Sonbisenti… ma es sta na Praia?

ALSINDA – (bóka abertu) Béba, a-mi tanbe é gosi li ki N sa ta sabe. A-bo, bu sabe ma es ka ta skrebe… ma es ka ten dinheru pa es poi karta na koreiu.

Dr. DJOKIN – Trubunal ka manda abiza-nhos ma es sa ta binha di Sonvisenti, nen ma es ta julgdu manhan?

ALSINDA KU BÉBA – Tioxi, nha fidju.

Dra. MÓNIKA – Nton nhos ka ten nobidadi di kunpanheru?

ALSINDA – Dasdi ki es mandadu pa Sonbisenti, dja ten séti anu.

Dra. MÓNIKA – Pamodi ki es mandadu pa Sonvisenti?

ALSINDA – Fladu ma un guarda pidi-l kinhentus meres, e ka teneba… kel guarda invira ku el.

Dra. MÓNIKA – Paké ki guarda pidi-l kinhentus meres?

Dr. DJOKIN – E sa ta debeba el?

ALSINDA – Kel N ka sabe.

Dra. MÓNIKA – So pamodi e ka da kel guarda kinhentus meres… es manda-l Sonvisenti?

ALSINDA – Fladu ma un diâ e raklama ma kanja ki es dadu pa djanta staba kasabi, xalalá, ma ka teneba nen karni nen pexi… kel guarda bai ranja-l rodidju ku deretor...

BÉBA – Fladu ma purmeru, Palu Murenu manda guardas ku pulisia ruma nel, sota-l… (E ta linpa lágua) ma es fra-l un odju, es kebra-l un mo ku dos osu kostéla.

Dra. MÓNIKA – Kenha ki é es Palu Murenu?

BÉBA – É deretor di kadiâ.

ALSINDA – Runhu sima frida kadera. Ta dági na prezus sima kusa ki e ka ten korason... ki e ka ten alma na si korpu.

Dr. DJOKIN – Kenha ki konta-nhos kel stória li?

ALSINDA – Un nos bizinhu ki staba na kadiâ djuntu ku el.

Dr. DJOKIN – (pa Béba) Kantu fidju ki nhos ten, nha ku el?

BÉBA – Mi ku el nu ten dos fidju.

Dr. DJOKIN – Modi ki é nomi di nhos fidju?

BÉBA – Un más grandi, si nomi é Zé Rui. Gosi e sta moradu na si kasa.

Dr. DJOKIN – I Kel-otu… tanbe sta moradu na si kasa?

BÉBA – El é nbarka pa Angola djuntu ku un mudjer ki txomaba Róza, dasdi kantu e staba ku dos anu i tal. Si e sta bibu inda, dja e sta ku vinti i tal anu.

Dr. DJOKIN – Modi ki é si nomi? Tioxi nha ka rasebe si notísia?

BÉBA – Tioxi, dasdi ki e bai, N ka obi nun nobidadi. E txoma Djokin, nomi di un si tiu, armun di si pai.

Dra. MÓNIKA – (pa Alsinda) I kel di-nha ki bai Purtugal, modi ki kel mudjer ki bai ku el txoma?

ALSINDA – Kel ki leba Mónika di-meu? E txoma Luluxa.

Dra. MÓNIKA – (nervozu, ta konsedja Dr. na obidu) Nu po-s kusa na pratu linpu.

Dr. DJOKIN – (kada bes más kalmu) Nos ki sa ta bai julga-s manhan.

ALSINDA – Ka nhos fla?!

BÉBA – Inda es ta bai fika más tenpu na kadiâ?

Dra. MÓNIKA – So dispos di julgamentu ki nu ta sabe. A-mi é ses divogadu.

Dr. DJOKIN – Si nhos kre nhos pode bai sisti julgamentu. Ta komesa dés óra, na trubunal riba Praia.

BÉBA – Xiiii! A-mi go N ka tene nun tiston pa N paga karu…

ALSINDA – A-mi N ta bai ñar-ñari un kanekinha ki Pedrinhu kustuma ta poi dinheru ki e ta nganha na ngraxa sapatu, N ta lokoti-l N ta odja si ta txiga-nu paga karu. Si ta da pa nos tres…!

Dr. DJOKIN – (pa Alsinda) A-nha nha sabe na undi ki é nos kuartu.

ALSINDA – Di nhos tudu dos N sabe.

Dr. DJOKIN – Óras ki nha larga trabadju, nhos bai atxa-nu nu ta da-nhos dinheru pa nhos paga karu.

ALSINDA – A-mi N ta larga trabadju noti Dimás… nhos ta debe sta na sonu!

Dra. MÓNIKA – Nhos bai sime. Nu ta spéra-nhos.

ALSINDA – Béba, bu ta spera-m, o bu kre bai bu ta ben?

BÉBA – Náh! Mi dja N sta li dja, N ta spéra un-bes!

Mónika ku Djokin ta labanta, es ta fla-s txau. Mónika ta da Pedrinhu beju na tésta, Djokin ta kore-l mo na pá.