About Us

The Leading Cape Verdean News Site | O Líder da Informação na Diáspora
Advertise With Us

Saturday, 01 November 2014
BLOGS - Nha madrasta

Upcoming Events
Sat Sep 20
Citizenship Day in Boston: Free Workshop
Sat Sep 20 @12:00PM - 06:30PM
School Supply Drive & Cookout (by Asosiason di Fidjus i Amigus di Santa Cruz)
Sat Oct 11 @ 7:00PM -
CV Association in New Bedford: Anniversary Gala
Banner
Follow us on

Google Picasa

Joomla Templates and Joomla Extensions by ZooTemplate.Com
Classifieds

 
     
Armindo Tavares
Nha madrastaPrintE-mail
Sunday, 08 May 2011
Written by Armindo Tavares

armindo-tavares.jpg

Diana,  ku un saku di konpra na mo,  ta kôntra ku Dáriu ku un pasta baxu di brasu, es ka ta fla kunpanheru mantenha. Três pasu dipôs, Diana ta lôlo ta kai, Dáriu ta bai djuda-l labanta.

 

(Pesa di Tiatu - Trajédia - ku kuatu átu)



P E R S O N A J I


DÁRIU, fidju di Agustu, i fidju di kiriason di Mariâ Txika.

DIANA, amiga di Dáriu, si futuru mudjer.

AGUSTU, pai di Dáriu.

MARIÂ TXIKA, madrasta di Dáriu.

DÉRIU, amigu di Dáriu, ta bai kontra el na julgamentu.

JIZELA, ta bai kontra Dáriu na julgamentu.

ZURAIMA, armun fémia di Diana.

PURKURADOR DI REPÚBLIKA, ta akuza Dáriu.

JUÍZA, ta julga i ta kondena Dáriu.

DIVOGADU, divogadu di Dáriu.

RUTI LALI, vítima di asidenti ku karu ki Dáriu sa ta giaba.

OFISIAL DI DILIJENSIA, funsionáriu di Trubunal.

SKRIVON, funsionáriu di Trubunal.

SANTUS DÁDA, pulísia di piketi na Ospital.

PALU MURENU, deretor di Kadiâ.

TUNÁ, kasareru di kadiâ.

TRÔLU, guarda di kadiâ.

NHU MARKU, guarda di kadiâ.

MÁRIU, guarda di kadiâ.

 

I ÁTU

I SENA

DÁRIU KU DIANA

Diana,  ku un saku di konpra na mo,  ta kôntra ku Dáriu ku un pasta baxu di brasu, es ka ta fla kunpanheru mantenha. Três pasu dipôs, Diana ta lôlo ta kai, Dáriu ta bai djuda-l labanta.

DÁRIU (ku el pegadu na un brasu) Bu da pankada?

DIANA – Nau. Parse-m ma ka foi mutu gravi. (E ta ragasa saia un-kusinha, e ta kore mo na perna) So kes foladura li ki sa ta arde-m... mas ta pasa.

DÁRIU – Djobe dretu si bu ka sta ku más ninhun kau ta due-bu, fidju-fémia. Si otu kau sa ta due-bu N ta leba-bu Nformásia es ta sukuta-bu es ta kura-bu.

DIANA – Mutu obrigadu pa bu atenson. N sta dretu.

DÁRIU – N ta spera ma ka ta pasa di un sinplis sustu.

DIANA – Mutu obrigadu. Ka debe ser más di ki isu mesmu.

DÁRIU – Dja agora…! Si bu ka ta npôrta... a-mi N txôma Dáriu. I bo?

DIANA – A-mi é Diana.

DÁRIU – A-bo é di li di Sonvisenti?

DIANA – Nau. Nha pai é di Praia, nha mai é di Sanikulau. A-mi N nâse na Santanton, undi nha pai era pursor i nha mai era infirmera.

DÁRIU – Nton, bu sta li di féria?

DIANA – Tanbe nau.

DÁRIU – Nton…?!

DIANA – Bu sabe ma la na Santanton so ta studadu ti kintu anu di Liseu.

DÁRIU – N sabe.

DIANA – Kantu N fase kintu anu – dja ten dôs anu – nha pai ku nha mai manda-m pa Sonvisenti pa-m ben studa sextu anu. N fika ospradu na kasa di un nha tiu, armun di nha mai. Mas, si mudjer ta faseba mi mutu skodjensa ku un nha prima, un si fidja fémia. Nton es anu, nha pai ku nha mai rozolve rênda un kasa li na Sonvisenti pa es pode kunpanha-m.

DÁRIU – I ses inpregu la na Santanton, go?

DIANA – Dja es kaba rafôrma.

DÁRIU – Dásdi ki bu pai ku bu mai bai trabadja na Santanton tioxi es ka bai pa ses ilha?

DIANA – Ker-dizer… bai... es bai. So ki di-un-bes ki nau. Komu es ta trabadjaba na Santanton, es kíria un anbienti familiar ku gentis di la, es fase un kasa, es ten ses fidjus i es kaba pa fíksa rizidensia. Di ves en kuantu es ta bai pasa féria.

DÁRIU – Nton, bu debe ten más armuns!

DIANA – N ten más sinku armun: três matxu, dôs fémia. Nha mai pari três bariga... três kazar di fidju.

DÁRIU – Modi?! E pari gémia três bes un trás di otu?

DIANA – A-mi N ka gémia!

DÁRIU – Nhordes…! Kasta di kusa é kel-li? Bu sa ta goza ku mi!

DIANA – N sa ta papia ku bo na médi-vera. Nha mai tevi na si purmeru parti un par di gémia di dôs mininu matxu. Dipôs, e pari-m mi. Pur últimu e pari gémia di três, dôs fémia un matxu.

DÁRIU – Boa! Kel-li é fantástiku. (E ta djobe pa ruloji) Mas Diana, bu sabe ma tenpu é dinheru i, ma dinheru é oru.

DIANA – Dja-m rapara ma bu sta ku presa. Mutu obrigadu más un bes.

DÁRIU – N sta ku presa mé, mas N ta purmete ma N ta odja-bu más bes i ma N ta papia ku bo, sta sertu? N gosta di konxe-bu i N ta spera ma bu ka ta xinti dor más tardi.

DIANA – Mutu obrigadu. Ken ki ta agradise-bu é mi.

DÁRIU – N ka fase nada dimás. N fase kel ki kualker algen ta faseba. Txau. (E ta da rinkada, e ta tôrna pára, e ta vôlta) Odja Diana, tudu diâ di tardi N ta kustuma bai Prasa Nova, lá na Morada.

DIANA – Mi N môra prisizamenti na ladu di Prasa Nova. Na kel prédiu ki fika trás di Koreiu.

DÁRIU – Sta ben. Un diâ di es nu ta kôntra nu ta papia midjor. (Es ta tôrna dispidi).

 

II SENA

DÁRIU KU DIANA

Na Prasa Nova, timenti Diana ta pasia, Dáriu ta sta xintadu na un banku ta le un ravista. Diana ta da uns-dôs volta ta odja-l, ta fla-l mantenha es ta poi ta konbêrsa.

DIANA – Bonoiti, Dáriu.

DÁRIU – Olá, Diana!

DIANA – Diskulpa-m pamodi dja N disvia-bu di bus filozofiâ.

DÁRIU – Dexa di trosa. Dja bu sta midjor?

DIANA – Odja... prontu pa... otu.

DÁRIU – Ka bu brinka ku kusa sériu. Si bu sabe modi ki N fika priokupadu ku bo kel diâ!

DIANA – Asériu?!

DÁRIU – Paké ki N ten nisisidadi di ngana-bu?

DIANA – Obrigadu. N sta na brinkadera ku bo.

DÁRIU – Ti nha pai purgunta-m kusé ki N tinha, N konta-l. Koitadinhu! E fika ton tristi kantu N konta-l…!

DIANA – Nhordes…! Ú-ki foi ki bu bai kônta bu pai? Ma N panha un asidenti? (E ta ri) Mi tanbe N kônta nhas família modi ki bu foi sinpátiku ku mi es fika rai-di kontenti.

DÁRIU – Kusé ki bu atxa ma N ta kônta nha pai? N konta-l izatamenti kel ki pasa. Ma bu lôlo, ma bu kai i ma N djuda-bu labanta.

DIANA – Mas bu ka fla-s ma N da ku mo dentu bosta katxor?! (Es ta ri) So ka bu atxa rabés: a-bo é un drópis. (E ta txiga más pertu, Dáriu ta stende-l mo ta puxa-l ta po-l xinta na si ladu) Odja, nha pai, ku nha mai ku nhas armuns fla ma es ten gana di konxe-bu. Até es pidi-m más...

DÁRIU – Kusé más ki es pidi-bu?

DIANA – Pa N kunbida-bu un diâ pa bu bai lanxa ku nos. Bu ta sêta o nau?

DÁRIU – Klaru ki N ta sêta. Ki diâ?

DIANA – Kel-o-ki N bai kasa, N ta tôma troga ku es, dipôs N ta fla-bu. Da-m bu núnbru di tilifoni N ta liga-bu inda oxi. Tanbe... si bu kre tôma di-meu...

DÁRIU – É klaru ki N ta kre. Ki mal ki ten – di nha parti – si N ten bu nunbru tilifoni?

 

III SENA

AGUSTU KU DÁRIU

Xintadu na sala.

AGUSTU – Nha fidju, N ka odja nada di mal na es namoru. Si bu gosta del…!

DÁRIU – Pai, N ka gosta del... (Pai ta ragala odju) Nu gosta di kunpanheru... nu ta ama i nu ta adora kunpanheru. Si mai ku si pai é nháku di algen. Es é un anju, nha pai.

AGUSTU – Nha fidju, bu pode kônta ku mi. N ta sêta nhos namoru i N ta da-nhos tudu apoiu. Ki tenpu ki bu kre traze-l li na kasa pa nu ben konxe kunpanheru?

DÁRIU – N ka sabe si e ta kre ben dja ton faxi si.

AGUSTU – Seja kavalheru, nha rapás. Ki rapariga ki ka ta kre konxe kasa di pai ku mai di si namoradu?

DÁRIU – É si mé! N ta kunbida-l, nton. Mas... pai, i Nha Mariâ Txika... nha madrasta?! Será ki e ta nkara es kusa sima pai dja nkara pa e sêta pa N tarse menbra li na kasa?

AGUSTU – Dexa tudu ku mi. Bu pode manda-l ben oras ki bu kre.

DÁRIU – Nton, sta bon. N ta spera ma nhu ta gosta del.

AGUSTU – N ta kridita ma nha fidju ten bon gostu.

 

IV SENA

AGUSTU, DIANA KU DÁRIU

Xintadu na sala.

AGUSTU – Nha fidju, ka bu dexa-l kapri-bu. É ka mutu faxi ki nu ta konsigi atxa un kusa sima kel-li. Rapariga é linda! (Pa Diana) Nha fidju-fémia, bu ka ta kalkula alegriâ ki bu traze-m ku es bu bizita na nha kasa, i di N sabe ma dja a-bo é más un na nha família.

DIANA – Obrigada, sinhor. (Pa Dáriu) Bu pai é xuxanti.

DÁRIU – Kel bedju ki bu sa ta odja-li, dja vive si tenpu. E konxe kusa ki bale.

AGUSTU – É ka so kusa ki bale ki N konxe. Tanbe N sabe kuandu ki el é sériu. Amor ki kel minina li ten pa bo, sima sta traduzidu na si odju, é sinseru i onestu.

DIANA – A-nho é sinpátiku i mutu intilijenti. (E ta labanta) Nhu dexa-m N bai da nho un bejinhu. (E ta nbaxa pa e da-l beju, Mariâ Txika ta kanba).

MARIÂ TXIKA – Kel-li é kusé? Kusé ki nhos sa ta fase na nha sala, xintadu riba di nha sufá, sima ki kel-li é ka nada, go bu kre beja-m nha omi?

AGUSTU – Txika, nha kretxeu, el é menbra di nos fidju... di Dáriu.

MARIÂ TXIKA – Ki tenpu ki N ten fidju ki txôma Dáriu? I a-mi N ka bu kretxeu. Bai txôma bu mai di bu kretxeu. É so bo ki tene kel stapor li ku tudu abuzu na es kasa. Mas, ta fika klaru, ki di gosi pa frenti, N ka ta atxa ninhun malatriza xintadu na nha sala. Ten un-munti pardueru, fodjada ku lapa pa ta kôntra ku putekas. (E ta grita rixu) Na nha kasa nau, nau, naaaaau. Pa prósimu bes dja N sabe kusé ki N ta fase. Si N ka fase ka txôma-m más Mariâ Txika Atalaia di Pina. (Dáriu ta da Diana mo es ta sai boka ian-piu).

 

V SENA

DÁRIU KU AGUSTU

Xintadu na sala.

DÁRIU – Pai, N ka ta pursebe pamodi ki nha madrasta ta trata-m así di es modi. E po-m na uma burgonha ku nha menbra! Da-m so gana manda txon abri pa N kanba.

AGUSTU – Nha fidju, N sisti tudu. N ka fla nada kel-ora pa N ka dismuraliza rapariga más di ki sima e staba. N purfiri kala, pa bu ben i pa suguransa di amor ki rapariga ten pa bo. Mas, bu pode sêta na mi: Txika ten ki splika-m pamodi ki e fase isu.

DÁRIU – Mas pai, pelu-menus nhu ta flaba un palabra so na kel altura, pa nha difeza.

AGUSTU – Nha fidju, dja N sabe ma bu ta pensa si i, ma bu ta atxa ma era midjor si N meteba kel-ora. Mas, nau. Era pior. Odja ma rapariga inda ka konxe-nu dretu. Si N kudiba bu madrasta kel-ora, nu ta entraba nun diskutison du diabu, i rapariga ta fikaba mal inprisionada ku nos. Bu sa ta pursebe?

DÁRIU – Pai, kel-li N ka ta pursebe nunka más. Nhu sabe ma N ka ten mai. Kantu mi era pikinoti, nhu ta sotaba mi tudu ora pamodi nha madrasta. Basta e inventaba kualker kusa kontra mi e flaba nho, nhu ta daba el senpri rezon. Nha kôri ta pagaba kel-ora. Mumentu más filís pa nha madrasta era kel-o-ki e pursebeba ma N staba tristi, ma N sa ta padiseba di algun kusa. Nha pai, oxi, pelu-menus nhu prizensia! I nhu kontínua kaladu, sen fla po, nen barapó.

AGUSTU – Dáriu, N prizensia sin. Mas ka bu ser injustu ku mi. Pode até ser ki dja N foi mau ku bo, di faktu, mas subu ú-ki kontise oxi, apenas bu debe konkôrda ku mi. Bu ten skola sabidu mé, mas ka bu skese ma oredja é más bedju di ki kifri. É mi ki pari-bu. Si N ruspondeba el, bu menbra ta baba diziludidu, ta pensa dásdi já na ben infrênta un família di malkiriadus, ki di-serteza nha fidju ta staba metedu. Bu konxe kel ditadu ki ta fla: «Tal pai, tal fidju?» Sima N ka rusponde-l, rapariga ta bai ku reiba so di el i bo bu ta fika sáfu. «Bu pai é idukadu, bu madrasta é un bruxa, a-bo é bonzinhu pamodi bu ka fidju di bu madrasta». N sta sertu o N sta eradu?

DÁRIU – Ben, rafletindu un-kusinha, ta parse ma oxi nhu ten rezon.

AGUSTU – Dáriu, é verdadi ki dja dura ki N pursebe ma N ten sidu dimaziadu brutu ku bo. N ka ruspeta alma di bu mai – Dios firia-l si alma, da-l un bon kantu na gulória – bu madrasta ngana-m duranti un-munti tenpu, e obriga-m maltrata-bu sen N da konta. Di gêtu ki e ta kontaba mi ma e ta gostaba di bo i ma bu ta faseba el kabesa-rixu, ta obrigaba mi sêta na el.

DÁRIU – Papá, ku kel-li nhu kre fla ma go, dja nhu rakunhese eru di-nho, go nhu kre pidi-m purdon?

AGUSTU – Sin, nha fidju. Txika, bu madrasta, ta konsigiba senpri po-m kontra bo. E ta nbarsaba mi, e ta daba mi beju, e ta flaba mi: – “Agustu, bai ku mi kobon”. – Kel-o-ki nu txigaba e ta kontaba mi modi ki bu staba ku kabesa rixu… sima e ta konta-m e ta txôra.

DÁRIU – Sta dretu papá. Mas nho nhu ka podeba pensaba purmeru? Pamodi ki nhu ka ta papiaba ku mi? Pelu-menus, nhu ta serba menus injustu. Nhu ta dadjiba na mi tudu diâ i, nhu ka ta dadjiba na mi sima dadji na un fidju i nen tonpoku sima dadji na un kiriansa. Nhu ta daba mi so soku - pa undi panha -nhu ta daba mi pontapé, ku bargadju boi, ku sintu di kôri i ku bara marmuleru.

AGUSTU – Nha fidju mansu, N sabe! N ka kre pa nu papia más nisu.

DÁRIU – Papá, kenha ki pidi perdon, é pamodi dja é xinti si kulpa. Ken ki ta púrdua ten ki sabe kusé ki e sa púrdua. N sabe ma gosi-li nhu sa ta sufri so pamodi nhu sa ta obi verdadi. Mas, mi N sufri na sêta, N tôma na kosta N kala boka ketu. Nha madrasta pusta na nha disgrasia. E njura fase tudu pa e ganha posta. N ta Lênbra  klaru kantu nha mai ta moreba. N staba ku dés anu i N sa ta studaba kuarta klasi. N sabeba di rexa entri el ku nha madrasta. I N sabe tanbe ma tioxi nhu ka da nha mai rezon. E moreba di parti. E more ku un fidju di-nho na si bariga. Un armun di-meu, ki mesmu asin, foi mutu más filis di ki mi pamodi e ka txiga di konxe Nha Mariâ Txika.

AGUSTU – Dáriu si bu ka pára di maltrata-m N ta labanta di li N ta dexa-bu bo-so.

DÁRIU – Sta dretu papá. Nhu diskulpa-m. N ta kala. (E ta nbarsa si pai).

 

VI SENA

DÁRIU KU DIANA

DÁRIU – Nha kirida, N ta majina bu sufrimentu, mas di-meu tanbe é ka menus ki di-bo.

DIANA – É verdadi Dáriu. N fika rai-di magoadu ku bu madrasta. N ka sabe pamodi ki un omi ketu sima bu pai la ta merese un mudjer di kel-la. Bu pai é rai-di idukadu. Odja, nha pai é mutu mansu tanbe, mas, kantu N konta-l, e fika xatiadu, e fla ma si era el e ta daba kel bedja uma ratxa kosta.

DÁRIU – Diana, nha pai é runhu so ku mi...

DIANA – Runhu ku bo?! Kel omi ki ta parse ketu la…?!

DÁRIU – Ketu so ku Nha Mariâ Txika. El kuazi é ta beja nha madrasta na sola-pe. Pa el, tioxi nha madrasta ka era kapás di kônta kasí o di fase algen kusa kadretu.

DIANA – Dáriu, bu debe ten pasadu un-bokadu tirsidjadu ku el!

DÁRIU – Nha amor, pa N fla-bu verdadi, nha madrasta tioxi ka dagi na mi. Tanbe ka mesteba. E tenba si karasku ki ta kunpriba si ordi na skarera.

DIANA – Bu pai ta dagiba na bo?

DÁRIU – Djuzus mariâ! Dagi na mi é favor. Diana, N ta konta-bu tudu pa bu ntende, tanbe pa N dizabafa.

DIANA – Konta-m moku pamodi N sta ku gana obi es stória tristi, di es bu marguradu vivensia.

DÁRIU – N kiria mutu fitxadu... N ka di konbersu ku tudu algen. Nha kiriason nxina-m ser kobardu. La na kasa, kada opinion ki saíba di nha boka ta kustaba mi un spantu o un supapu na fusinhu.

DIANA – Ki bu pai ta daba bo?

DÁRIU – Sima bu ta obi. Kantu nha mai more N staba ku dés anu di idadi i N sa ta studaba sugundu grau...

DIANA – Modi ki bu mai more, Dáriu? Kusé ki e tinha?

DÀRIU – Nha mai ka tinha nada, Diana. E more di parti.

DIANA – Á nha genti…! Forti duedu!

DÁRIU – Pa kenha ki ta sêta na korda, ka ten dúvida ma nha mai matadu...

DIANA – Ma bu mai matadu?! Modi? Bo bu ka fla ma e more di parti?

DÁRIU – Dipôs di un-munti anu ki e more, atxadu un letratu di-sel na boronsera di kasa di Nhô Konpô, un mestri famadu. I senpri ta rueda ma nha madrasta ta faseba el mal-fêtu, pamodi es dôs es ka ta filaba ku kunpanheru.

DIANA – Bu madrasta ta bai kasa'l mestri?

DÁRIU – Nha madrasta gosta di bai kasa mestri fase korda pa e tristôrna algen. Basta e ka gosta di bo... e ta da-bu pa palabra.

DIANA – Nhordes…! I kantu anu ki bu mai tinha?

DÁRIU – Nha mai era más bedju di ki mi dizaseti anu. Kantu e staba ku vinti i seti, na pari si sugundu fidju, nha armun ka txiga nen di ser un nadu mortu, nha mai dja staba kadabra. Es nteradu na mesmu koba i na mesmu kaxon. (E ta linpa lágua ku kosta mo) Nunka más N ta skese si últimu palabra ki e papia ku mi, sugundus antis di e more. E pega-m na nha pulsu séku di mininu, e kalka ku tudu si forsa ki inda restaba el, e fla-m: " a fidju, txiga pertu'l mi pa N barsa-bu, pa N dispidi di bo. Dja-m xinti ma mi dja N ka é di es mundu más. Odju sa ta bira-m sukuru, nha forsa sa ta kaba, nha alma sa ta rinka-m di korpu. Pidi Nhordes pa resebe-m la di-riba, N ka ta kansa di rasa pa N pidi-L pa e proteji nha Dáriu". I si boka nunka más ka abri pa fla más nada.

DIANA – Ka bu txôra. N sabe ma bu ten dor, mas N kre obi-bu. Kontinua.

DÁRIU – Kantu e more, (e ta salusa) ka ten un mês, nha pai bende nos kasa, nu bai môra ku nha madrasta. Dianti di nha pai, nha madrasta ta finjiba ser nha amigu pa e podeba ngana-l. N bai ta kíria, el senpri nha amigu dianti di nha pai. Kel-o-ki nha pai ka staba e ta njuriaba mi, oras ki nha pai txiga e ta faseba mi rodidju ku lágua na odju. E ta flaba el ma fidju di algen kanpresta, ma é mal-lobadu; ma sima e gosta di mi, ma N ta paga-l  ingratidon.

DIANA – Ki e ten koraji fla bu pai?! Modi ki bu pai ta flaba bo?

DÁRIU – Modi ki e ta flaba mi?! O bu kre purgunta-m kusé ki e ta faseba mi?! Nha pai ta ratxaba mi kosta pior ki katxor di nha madrasta. So pa bu odja, un diâ katxor di nha madrasta da fús dentu kasa – nha pai staba so na almusaba – e da-l un pontapé, nha madrasta panha un djakrandan ki staba riba-l di tanboru xeiu di kumida e da nha pai ku el, pa sorti bai panha na paredi.

DIANA – El é disgrasiada si, Dáriu?!

DÁRIU – Si e disgrasiada…! Diana, kantu N fase sugundu grau, N martikula na Siklu Purparatóriu. Tudu purparadu pa N bai komesa skola la Praia, bespa diâ, Nha Txika mete nha pai kusa na kabesa, nha pai ka dexa-m bai skola.

DIANA – Gosi go ki dja bu kursa, es debe sta ku burgonha.

DÁRIU – Burgonha é kenha ki ten, Diana. Nha madrasta ka ta burgônha ku nada.

DIANA – Ta parse propi dentu si rostu!

DÁRIU – Ku dizoitu anu N bai pa tropa i N sai ku vinti. Ku vinti i un anu N fase sugundu anu di Siklu. Pa N fase skrison pa inzami N bende un kalsa pa presu di selu ki N mesteba pa N fase skrison. N pasa ku midjor nota di nha Konsedju. N ratôma gostu di studa i na três anu N konplêta Liseu... N fase sétimu anu. N konsigi un bolsa di studu i prisizamenti es anu N kaba kursu di Agronimiâ. É pur-isu ki nha madrasta sta asi ravoltadu, pamodi nu fundu, e perde posta ki e faseba ku el propi, ma nunka N ka ta serba algen na bida.

DIANA – É si propi. Si ki ta dadu algen rasposta. Bafatada ku mo fitxadu.

DÁRIU – Ku bo, foi so más un djugada ki e tênta fase kontra mi. Mas, di es bes parse-m ma nha pai dja da konta ki kasta di mudjer ki e ten. (Diana ta nbarsa-l es ta beja kunpanheru).

 

VII SENA

DÁRIU KU AGUSTU

Xintadu na sala.

AGUSTU – Nha fidju, N ta spera ma dja bu sta ku kabesa más diskansadu pa bu ntende-m.

DÁRIU – Sta ben, nha pai. Kusé ki nhu kre fla-m?

AGUSTU – Dja-m papia ku bu madrasta, e tênta konprende-m, mas mi N sabe ma el e falsu, ma e sabe disfalsa mutu ben. Mas, N tene un ideia ku bo.

DÁRIU – Ki ideia? Nhu ka al sa ta tôma ideia di Nha Txika pa di-nho?

AGUSTU – É klaru ki nau, nha fidju. Odja-li, manhan bu ta djobe un pedreru pa bai da un tokixinhu na kel kasa di Munti Susegu bu ta bai môra la. Si bu menbra kre bai môra ku bo... kasa é di-bo a-partir di gosi. Timenti bu sta la bo so, bu pode ben tôma banhu, bu ben kume li na kasa tudu diâ.

DÁRIU – Ki alíviu, nha pai! N ka ta kridita! Nhu sa ta papia na mé-divera?

AGUSTU – N pode ka ten dinheru, mas N ten palabra, nha fidju. (E ta lônga-l txabi) Pêga txabi, kel-o-ki pedreru dja kaba konpu kasa na bu gostu, bu ta ben tôma dinheru bu ta bai paga-l. Mobílias sta la tudu nobu ki N manda poi ontordiâ. Si kre ka staba, daki a nada bu ta komesa trabadja i bu ta bai ganha un-munti dinheru ku bu kursu ki bu ten.

DÁRIU – Nha pai é spetakular! N ta bai fla tudu mundu modi ki N ten un pai maravilhozu. Un amigu fantástiku…! Di sinku strela.

Es ta nbarsa.

 

VIII SENA

DÁRIU KU DIANA

Na ses kasa nobu. Diana sta prênha gros. Dáriu ta laba, ta trôka rôpa ta sai.

DÀRIU – Kirida, N ta bai ti li-sin-sin da un volta, N ta bai trata un asuntu, N ta vôlta ja. (Diana ka ta kudi-l. e ta bai pa el, e ta da-l un beju ta sai).

 

IX SENA

DÁRIU KU JIZELA

DÁRIU – Olá Jizela, odja modi ki bu sta grandi!

JIZELA – A-bo tanbe, Dáriu. Gosi bu ka sta sima kantu N konxeba bo. Kantu tenpu?! Nton, modi ki bu ten pasadu?

DÁRIU – Odja... N kaba kursu es anu.

JIZELA – Nton N pode fase publisidadi ma dja nu ten dotor na zona?

DÁRIU – Dotor nau. Injinheru... Agrónimu.

JIZELA – Boa. Omesmu kursu ku Almirka Kabral.

DÁRIU – Na mesmu Fakuldadi, i ku omesmu nota. I bo, kusé ki bu fase duranti es tenpu tudu?

JIZELA – Odja, a-mi N kaba Liseu... N ka konsigi bolsa, N sa ta da skola na Siklu. Pa anu ki ta ben N sa ta pensa bai fase Baxarelatu.

DÁRIU – Baxarelatu na kusé ki bu sa ta pensa fase?

JIZELA – Língua i leteratura muderna.

DÁRIU – Ki bon notísia! I kusé más?

JIZELA – Du-restu é bo ki ta fla. Afinal, dja bu kasa?

DÁRIU – Inda nau. I bo?

JIZELA – Tanbe nau. (Na ton di brinkadera) Sikadjar nu sa ta spera kunpanheru.

DÁRIU – Sikadjar!

JIZELA – N ka ten kel sorti pa N ser noiba di sinhor injinheru.

DÁRIU – Si tioxi bu ka kontaba kasí… nton go, bai konfêsa, pur-favor!

JIZELA – A-bo é dimás, mos! Bu ta parse sumuladu, mas senpri bu foi txokotentu… kaba, intilijenti. (E ta bai pa Dáriu pa e fla-l mantenha ku dôs beju).

DIANA (ta parse di rapenti trás di Dáriu) É bo, diskarada! (E ta da Jizela un bafatada ti ki ta kai) Dja bu êra ku bu omi? Kel-li é di-meu, sua porka, nanpresta, nodjenta…

DÁRIU – Diana, kel-li é kusé? Bu sta dodu o kusé ki bu tene na kabesa?

DIANA – Bo ki sta dodu ki sa ta anda ta ngana-m! Sinhor palerma. stúpidu, ordenáriu.

JIZELA – Dáriu, afinal bo é kasadu, bu sa ta tênta pasa fin-di-simana ku mi? Bu ngana-m! (Pa Diana) Agô, sinhora, apezar di ki é nha ki dagi na mi, N ta pidi nha diskulpa. Kenha ki ranja tudu konfuzon é kel bazalisku li. (Pa Dáriu) Obi dretu bardamerda: di oxi pa frenti N ka kre odja-bu nen pintadu di diamanti. Bu ka ta pasa di un gumitu di katxor.

DIANA (pa Dáriu) Bu ten lata pa bu fla ma é kasi? Va, fla la ma é kasi? Fla? Fla la pa N obi!

DÁRIU – Diana, bai kasa nu ta bai papia susegadu. Djobe pa bu bariga bu odja ma bu ka sta na stadu di xâtia. Pensa na nos fidju ki bu tene na bariga.

DIANA – Nos fidju?! Nha fidju. Kel mininu li, si Nhordes dja kre, e ta bai nâse la kasa di nha pai ku nha mai. N ka ta po-l bu nomi pa nada di es mundu.

 

X SENA

DÁRIU, DIANA, DÉRIU I UN GRUPU DI STUDANTI

Nun festa di finalista, Diana ku Dáriu ta sta xintadu na mesa djuntu di kunpanheru.

DÁRIU – Diana, bu pai ku bu mai sta bon? (Diana ka ta kudi) Diana, N fase-bu un purgunta! Sugundu étika o mural ta manda, kualker purgunta merese rasposta: sin, nau, o talbes.

DIANA – I si N ka kre kudi?

DÁRIU – Ka kre kudi é un direitu di kualker algen, mas etikamenti é inkuretu i lojikamenti é eradu.

DIANA – Kenha ki obi-bu ta papia di étika ku lójika pode pensa ma bo é algun etikolójiku.... algun purfetu.

DÁRIU – Algen pode pensa... mas a-mi N sabe ma N ka é. Bo bu sabe ma purfetu é paradoksu, Diana! Ka ten ningen purfetu. Nu mínimu, pode ten uns algen más inpurfetu ki otu.

DIANA – Pa bo, ki diferensa ki ten entri étika i lójika?

DÁRIU – Es é dôs kusa konpletamenti diferenti. Étika é sinplismenti mural. Ka ten obrigatoriadadi. Bu ta fase si bu kre, mas, si bu ka fase, ningen ka ta kastiga-bu. Enkuantu ki lójika e sênsia, é prisizu izatidon obrigatoriamenti na rasposta. Na lójika ten txaskan dôs rasposta pa kada purgunta; “aian o manau; o nton, "verdaderu o falsu”. Ka ta adimiti “ndemu”, nen “talbes”, nen “manbá”. Na lójika o é “fépu” o é “kanada”. Ka ten meiu termu. Dja-m konsigi rinka-bu rasposta di nha purgunta?

DIANA – Parse-m ma bu ka ten nada ki sabe di bida di nha pai ku nha mai.

DÁRIU – Kel-o-ki é pur ben, kualker algen sta na dever di prokupa ku otu. Inda pur-sima, bu família ki ten algun kusa ligadu ku mi. Bu pai ku bu mai é dônus di nha fidju fémia.

DIANA – Dônus di bu fidju fémia? Modi ki bu fidju fémia txôma? Kenha ki é si mai?

DÁRIU – Diana, mai di nha fidju fémia, ki N konxe é bo. Si nomi N sa ta ben purguntaba bo. Bu nêga fla-m pa nu bai rejista-l! Modi ki bu po-l nomi? Lênbra ma... – sima ki N dibinha ma e ta naseba fémia – N krêba poba el nomi di Kizi Kathlen, nomi di noiba di kel kamarada li. (E ta da Dériu ku mo na onbru).

DÉRIU – Nhos Lênbra ma nhos kunbida-m pa N ser padrinhu. (Pa Diana) É si o é ka si, kumadri?

DIANA – Mi N ka sabe.

DÁRIU – Diana, nha intenson é ka di getu ninhun, obriga-bu sta ku mi. Mas N ta pidi-bu pa bu purdua-m pur-amor di nos fidju fémia. N kre pa mi ku bo nu kiria-l, pa mi ku bo nu iduka-l. N ka kre ranja otu mudjer ki e ta konsidera si madrasta, menus inda pa bu ranja otu omi pa e fika ta txôma di padrastu. (Diana ta fika mudu) Bu kre pa N pidi Dériu pa nprista-m si karu pa nu bai da un voltinha ti Matiota? (Diana ta kontínua kaladu i Dáriu ta bira pa Dériu) Dériu, nprista-m txabi di bu karu, pur-favor. (Dáriu ta tôma txabi, ta labanta, ta pêga Diana na mo es ta sai, gentis ta fika ta djobe-s).

JIZELA (ta kanba, pasadu un bokadu) Kamaradas, nhos tôma kudadu na bebe “merdon”, pamodi sinhor Dáriu djá da un sinhora ku karu ki sta na Ospital sin-di more.

DÉRIU – Modi?! Ku nha karu?

JIZELA – Mi N ka sabe é ku ki karu. So N sabe ma kantu N sa ta bênba pa li, N odja un pulísia ta purgunta pa Dáriu xatiadu. Parse-m ma kantu e da mudjer ku karu ma e fuxi.

Na meiu di tristeza ku rabolisu, sena ta kaba i ta da




FIN DI PURMERU ÁTU

OBS: SUGUNDU ÁTU ta kontinua na prósimu núnbru di idison, ku Julgamentu di Dáriu.

Share/Save/Bookmark
 
Armindo Tavares

Armindo Tavares

REPÓRTER E BLOGUEIRO

BIO

Armindo Tavares, colaborador da FORCV, é responsável pela "Raportaji di Lisboa". É Licenciado em Dramaturgia e Bacharel em Direito e Informática. Como Professor Universitário deu aulas de Lingua Caboverdiana na Escola Superior de Educação de Setúbal - Portugal. É Presidente e Diretor Artístico da Associação de Teatro Miscelânea com sede na Amadora. É autor de cinco livros editados, um DVD e dezenhas de peças de teatro escritas, sendo uma, Forti Kulpa Rixu, vencedora "ex aequo" do Prémio Literário Pedro Cardoso 2010. É mestrando em Artes Performativas, especialidade - Escritas de Cena. Está a preparar um novo filme da peça Perdão, Imília.

Atenção: As opiniões expressas pelos colunistas não representam a posição da FORCV. Elas apenas traduzem o ponto de vista dos mesmos. A FORCV publica artigos de opiniões de diferentes colunistas com o intuíto de apresentar diversos pontos de vistas aos nossos leitores. Por isso, convidamos pessoas interessadas a enviar artigos de opiniões para editor@forcv.com.

Latest ArticlesMost Read Articles

Comments  

 
0 #9 Januario Mendes 2011-05-15 04:07
Parabens dr Armindo. boa sorte e mutu felicidadi na bu kaminhada continua ta leba nos kultura so si...
 
 
0 #8 Povu ten so un lingua 2011-05-12 08:20
Prinsipal kriteriu pa autonomiza ezistensia di un povu, e ezistensia di un lingua spesifiku, ku autonomia sintaksiku, frutu di un konvivensia autonomu di sekulus, rezultadu di konplementarida di ekonomiku i misturas sangineo, anbus tanbe di sekulus.

Si ten 2 o mas lingua, signifika ma ten 2 o mas povu.

Li na Kabu Verdi ten so un povu: Povu Kabuverdianu, ku, bazikamenti, mesmu orijen di pontu di vista sangineo, ku mesmu storia, mesmu matris linguistiku, enfin mesmu lingua, undi analfabetus di tudu ponta di Kabu Verdi ta komunika ku kunpanheru sen tradutor, kada un na respetivu varianti di mesmu lingua: lingua kabuverdianu.

Variantis ta ezisti na tudu lingua di mundu undi utilizadoris ka ta vive nun lugar pikinoti, istu e, undi tudu falanti ka ta sta fizikamenti pertu kunpanheru ta papia ku kunpanheru tudu ora masisamenti.

Nos Storia ta konta-nu ma lingua kabuverdianu nase na Bersu di Nason Kabuverdianu i spadja, atraves di pesoas di es Bersu, pa tudu ilha di Santiagu i, subsekuentiment i direta o indiretamenti, pa tudu Kabu Verdi i pa Gine-Bisau.

E pur isu ki nu ka ta ntende algen di Santume nen di Anu Bon nen di Goa nen di otus lugar undi ta papiadu kriolu di bazi leksikal purtuges sima di-nos.

Pamodi? Pabia es e otus povu. Ku otus storia. Ku vivensias autonomu en relason a nos.
 
 
0 #7 Pabia 2011-05-11 13:03
Yeahhhhhhhh na Badiu é mas sabi qui na lingua di otus ilhas. Bu tem razan. Du ba du ba du ba...........
 
 
0 #6 Marsianu nha Ida padri Nikulau Ferera 2011-05-11 11:00
Es pesa e kativanti, xeiu di situasons ki ta buli ku leitor.

Enfin, Dáriu faze-m falsia: N ka ta speraba ma el ta serba asi.

Trokadu uzu di nos lingua, dialogu e natural na es pesa, sima ta kontese na realidadi. Si pesa staba na otu lingua, el ka ta serba ton fiel a realidadi kabuverdianu. Na verdadi, el al serba un palhasada di realidadi kabuverdianu.
 
 
0 #5 Mário Monteiro 2011-05-11 06:58
Um work de grande valor cultural para C.V.
n formásia ou n farmásia ?
..ospradu
IV Como é q o Dáriu sabe q os pais da Diana são "nhaku di algen"
V modi pq n manera/ kôri
subu, pq n sobi o q kontise
VI karasku ?
dagiba ou dadgiba ?
o q quer dizer djakrandan ?
IX...falta Diana
Almirka Kabral
X....Matiola ?
 
 
0 #4 Armindo Tavares 2011-05-09 12:55
"Lôlo" ker dizer "skorêga" = "escorregar".
Tu mexti mais sklaresimentu?
 
 
0 #3 Pabia 2011-05-09 08:14
Alguen podia traduzir "lôlo" pra eu? Gracias.
 
 
0 #2 Alcides Tavares 2011-05-08 18:27
Bunitu!Parabens , Sr. Armindo.
 
 
0 #1 Manel Ortal 2011-05-08 16:42
Pesas sabi pa fronta. Riku!
 
   

Advertise - About Us - Site Map - RSS

© 2005-2014 forcv.com - All rights reserved, USA.